陳凱琳同鄭嘉穎今年迎接佢哋嘅B仔出世，目前陀B嘅陳凱琳生活幾寫意，一時出席商場活動、一時就約好姊妹見面。
陳凱琳今午貼出「少婦聯盟」合照，原來佢同譚凱琪、龔嘉欣同沈卓盈噚晚約埋打邊爐，趁農曆新年前相聚。
農曆新年就到，大家都趁住呢個咁開心日子同家人相聚食個團年飯。好似「少婦聯盟」嘅一班成員陳凱琳、龔嘉欣、譚凱琪同沈卓盈呢日大家就聚首一堂，提早食團年飯，食個火鍋Hot一Hot，凱琪仲話：「提早吃個團年飯，也不忘來個美顏照#少婦聯盟 #豬年快樂」
大家都好應節日氣氛着得好sharp，仲齊齊摸住Grace個肚，場面好溫馨呀！
龔嘉欣亦喺Ig貼相，寫道：「團個年~迎豬年!見得咁密嘅，今次又傾到兩點，由六點半到兩點，希望我哋嘅笑聲冇嘈親鄰居啦，仲有指定動作，摸一摸肚仔，沾一沾旺氣先。」
之後，佢哋又齊齊敷面膜，擺出搞鬼表情，真係睇見佢哋都開心呀！
（ig / 綜合報道）
