吳若希（Jinny）自從升呢做媽媽之後就成日PO同囡囡嘅溫馨日常，有時更會一家三口放閃，真係甜到漏。
不過Jinny近日可以話流年不利，先係喺TVB嘅節目《東京血拼攻略》被網民力數三宗罪，包括喺日本特賣場不停喪笑兼大大聲講嘢，跟住見到名牌袋時，仲港女上身失去理性。最衰係唔理「不准觸摸」嘅告示牌，用手摸一個價值過百萬港元嘅限量旅行篋。至於第三宗罪就更加低俗，佢對住台灣主持沈韋汝，猛話自己係「釣蝦女皇 Queen of 釣蝦」，當時台灣主持好尷尬，Jinny就係度自high喪笑。唔怪得知有網民要求踢佢出節目。加上早前有報道話佢眼紅菊梓喬頂咗自己嘅一姐地位，所以當菊梓喬攞「最受歡迎女歌星獎」，Jinny係台下喪笑贈慶。
呢日就有網友翻Jinny舊賬，話說佢去年10月一家三口去美國拉斯維加斯（Las Vegas）旅行時，叫老公何兆鴻（Alex）公司嘅生意客戶，如果冇幫襯就唔好打電話嚟阻住佢哋旅行，呢啲咪正宗豬隊友囉。
話說Jinny同Alex當時帶住一歲幾嘅囡囡淼淼去美國玩，仲係Instagram貼咗張兩父女喺酒店望出去嘅相，前面就係著名嘅Paris Las Vegas Hotel。
張相片本來平平冇奇，但係加上Jinny嘅言論，就變得好惹火，佢話：「真心，我老公真係好愛呢頭家，成個美國trip有大部份時間都在講電話傾生意，但so far沒有一單有回覆，真的只是跟客人齋傾。」Jinny話自己一落機都要準備工作，好似歌詞、歌單同歌衫，而且仲要照顧BB，跟住佢就同老公嘅客戶話：「所以，我希望那些齋吹水、冇行動的客人、不要再打給我老公了!因為你浪費了我一整個旅程!!!」即係叫啲客戶非誠勿擾。
可是吳若希霸氣留言維持不久，內文就被刪除，只餘下相片，由斷老公財路變成怕自斷財路。而昨日有網友將IG的原文截圖在社交網中分享，令一眾網民立即議論紛紛。
(綜合報道/apple daily)
