【會做人工受孕】洪天明:可以揀性別

    洪天明與周家蔚婚後育有兩個可愛仔仔,早前父親洪金寶生日,洪天明更PO出全家福,一家八口三代同堂,畫面超級溫馨!

    早前洪金寶講明好恨再抱孫,希望每個仔女都生3個…

    呢日洪天明出席慈善首映,提到爸爸呢個心願,問佢會唔會想追個女?

    佢坦言:「有個女梗係好,但有兩個已經好辛苦,係時間分配辛苦,我成日唔喺香港,唔想生咗個唔理佢,睇老婆想唔想生。」

    佢笑笑口話想細佬盡快結婚,咁就可以為其分擔,又指如決定再生,會到外國透過先進科技懷孕:「依家科技昌明,可以揀性別。我有朋友喺外國搵代母生,我同老婆講咁咪唔使咁辛苦,但佢擔心代母飲食唔健康。不過,雖然外國合法,但原來返到嚟香港係唔合法。(所以勸老婆生!)如果健康又承受到,再過一兩年啦。」

    咁有冇趁住今次旅行努力造人追豬女?佢就話一家幾口去旅行忙住湊仔,追女一事就順其自然:「其實知道有咗第一個仔之後,爸爸已經叫我快啲生個女,當時老婆有咗四個月咋!(老婆大壓力?)唔會,冇得迫嘅,等佢想生先。」

    另外,佢表示現時除了幕前外,還兼顧幕後工作,希望先專注事業。

    (綜合報道/on.cc)

    SHARE