【超索!】大肚香香為支持王祖藍豁出去

    懷孕6個多月的岑麗香(香香)早前夥拍王浩信為王祖藍處男執導賀歲片《你咪理,我愛你!》拍攝一場極盡視聽之娛的「型男索女」戲份。

    二人一個大晒健康性感及纖腰,一個爆肌大晒麒麟臂,身材弗到漏油,獲不少工作人員激讚「鼻血指數」爆燈。

    香香拍攝當日狀態大勇,以超熱褲上陣的她,從頭到腳零孕味,故當工作人員事後知道她拍攝期間已懷有身孕時,均嘖嘖稱奇,並大讚她為支持好友祖藍豁出去。

    香香早前出席首映禮已經自爆過初期開工原來已有B,直到拍至尾段才發現:「覺得個人上鏡有少少肥,試過攝影師叫我縮肚,我答佢會盡力,其實心諗都收唔到咁多,嗰時又未夠3個月唔講得。」

    雖然香香與王浩信出演的只是「幻想畫面」,但導演祖藍拍攝時比其他場面更為認真,出名「一TAKE收貨」的他,單是一幕「倒奶」鏡頭,便拍了足足超過一小時。事後問到為何對香香及王浩信特別嚴苛時,他笑言:「因為我覺得佢哋兩個都好有魅力,為咗唔好辜負佢哋嘅氣質同埋咁弗嘅身材,所以想將畫面拍攝到好唯美同埋吸引。結果剪完出嚟好多人都大讚佢哋兩個好鬼正,場戲好好睇、好深刻,我即刻放下咗心頭大石,亦叫對得住呢兩位咁幫手嘅演員。」

    至於香香,她則笑言為祖藍變咗「臭臭」:「為咗營造Sexy感,導演要我哋濕身擺甫士,所以倒咗有顏色嘅奶落我同浩信度。因為啲奶係好高咁倒落嚟,射到周圍都係。雖然我返到屋企已經第一時間沖涼,但就坐坐吓聞到異味,原來我啲衫同袋都畀奶濺到,啲奶過咗段時間開始發臭,咁我咪惟有成晚喺度洗洗洗。」

    (綜合報道/on.cc)

    SHARE