【兩年抱兩】朱家三口變四口:哥哥的確係有少少呷醋

    今日是大年卅,傳統中國人這天會一家人聚起來吃團年飯,對於16年嫁全國政協朱銘泉兒子、上市公司太子爺朱威霖(William)的蔡雪瑩(Snowy )來說,今年更加是特別的一年,事關16年8月已誕長子Wesley,去年6月再添小公主Sheryl,今個農曆年真正一家四口齊齊整整。

    Snowy曾有「至索主播」之稱,婚後離開新聞主播行列的她,兩年抱兩,一直專心相夫教子,只偶爾出席公開活動,日前她與老公William攜同一對子女,在北角接受《蘋果》訪問及示範製作福建家鄉菜,問夫婦二人今年新年願望是否追豬B?Snowy即望着老公傻笑,William就兩眼發光,笑着說:「係就梗係好啦!」

    William承認希望再添家庭成員,他說:「越多越好啦,我有三兄弟姐妹,至少都生多一個!咁我知道老婆收身好辛苦,佢都想等一等先。」Snowy則笑謂:「我諗今年嘅願望一定唔係生豬B,之前生囝囝後,如果你問我係咪有計劃即刻生,當時就真係嘅,但今次就唔會咁快諗住喇!」

    講到今年的農曆新年,朱家由三口變四口,Snowy謂:「記得上年我陀住囡囡,仲擔心緊哥哥嘅讀書問題,又擔心哥哥同妹妹係咪夾得嚟。當然,哥哥的確係有少少呷醋,妹妹啱啱出世,哥哥唔想望妹妹,情緒有時都好波動,但而家兄妹多咗互動,哥哥見到妹妹喊都會o氹佢,會同妹妹講『哥哥喺度,哥哥喺度』咁,但以前見到妹妹喊,佢就會偷笑。」

    說回Snowy和老公示範的福建家鄉菜,分別有「潤餅菜」、「五香卷」及「家鄉炸醋肉」,Snowy坦言平日甚少機會跟老公一齊入廚,因為老公工作比較忙,但最深刻是老公親手炮製西班牙海鮮飯給她吃。Snowy稱:「我本身係潮州人,媽咪都有教整啲家鄉菜,但係潮州菜其實都好簡單,好多都係蒸咗再放涼,我都承認老公整嗰啲,難度係高過我少少嘅!」

    至於新年朱家有甚麼傳統習俗?William直言:「屋企家庭觀念比較重,大時大節都會一家人過。」他又讚老婆雖然本身是潮州人,但短短時間都學懂了不少福建傳統菜式。Snowy即認叻說:「係呀,福建人過年買餸都有啲傳統,好似話要有3種海鮮5種肉咁,我而家自己去街市都識得買嘅!」

    (apple daily)

    SHARE