【高齡佗B四個月】黃澤鋒52歲太太首談懷孕後變化:全身都有

今日是情人節,51歲黃澤鋒和52歲的太太陳麗麗之間,多了個「電燈膽」,上月黃澤鋒開心share跟結婚9年的太太造人成功,陳麗麗無懼做超高齡產婦,為老公懷上豬寶寶。

廣告

廣告

懷孕4個月的陳麗麗已照得腹中塊肉是囡囡,而她的身形和身體狀況都開始起變化。
 黃澤鋒除兼顧幕前演出,還兼職教游水和打拳,夫妻生活簡約貼地,過往的情人節都只是吃茶餐廳,因為他們相信只要兩個人一齊食飯,即使清茶淡飯已經非常感恩。

「愛妻號」黃澤鋒日前先帶太太行公園浪漫一下,並獲途人認出送祝福,黃澤鋒又表示,今年會闊綽一點,帶太太嘆西餐,黃澤鋒又親手為太太陳麗麗炮製班㦸甜品,並在碟上寫上「I love you & BB」,陳麗麗開懷大嚼。

黃澤鋒夫婦的BB豬預產期在今年7月底,當他獲悉將要升呢做爸爸,他就更有動力賺奶粉錢,他日前接受《蘋果》專訪時對太太坦言:「我哋今年會使得多,所以太太份情人節禮物未諗到,不過我諗折現,老婆就最高興。」

黃澤鋒年過半百得女,快將和前世情人見面,他風騷說:「第一個BB,真係仔女都冇所謂,前世情人,我估佢係嚟治我,反正佢唔嚟治我,我老婆都會嚟治我。」

黃澤鋒對老婆錫到燶,「佢嫁畀我,可以嘅都遷就,咁人哋為乜嫁你先,做女都咁辛苦,如果嫁畀你更辛苦,做乜要嫁。」兩人緣起因為玩facebook,黃澤鋒笑言:「而家啲年輕人話『老餅』先玩fb,十年前玩fb好潮,我哋有共同朋友,我add咗陳麗麗,但大家一直未見過,之後喺朋友聚會認識,我對佢唔係一見鍾情,做朋友先,亦冇諗過同佢拍拖。」

兩人當年都年過40,同樣有閱歷,最終越走越埋,由拍拖到結婚,過程僅一年,也算是「閃婚」。黃澤鋒表示拍拖時間長短並不會取決對方是否適合結婚,「我以前段段感情,拍四、五年就散,以為了解多啲,其實要揀到啱先最重要。一旦揀啱,倒不如大家快啲結婚,穩定落嚟,畢竟大家年紀有個歲數,拖住唔結咪累人。」

黃澤鋒曾於04年與首任太太離婚,有過失婚經歷卻沒有為他帶來再婚的陰影,他打了一個比喻:「等於一隻馬騮俾人用繩束住,但突然剪斷咗條繩,馬騮會唔會拎番個套箍住自己,正確啲嚟講,我就正正用番條繩箍住自己條頸。我都問過自己,太太係我嘅『Ms. Right』,唔關歲數年紀,我同佢一齊嗰陣,好想畀個名份佢,即係要鎖緊自己,但係我自己願意咁去做,唔係太太迫我。」黃澤鋒回憶跟陳麗麗拍拖數月,女方帶他見家長,「我第一次見佢爸爸,岳父問我『你有乜嘢打算?』我直接答結婚,岳父佢冇出任何聲。」

兩人共識結婚,黃澤鋒覺得是對女方一份尊重:「我會朝住呢個方向去行,結婚就結婚,同拍拖同居完全兩回事,結婚責任大好多,我娶咗佢返嚟,我好過拖住人,大家目標清晰,知道係做緊乜嘢。咁我唔會再諗感情嘢,可以專注工作同家庭,太太亦同樣可以專注工作,大家行埋同一條路,時間亦過得好快。我哋每年都會去plan完成一啲嘢,咁多年大致上目標都達到,我係開心嘅。」今日上天賜黃澤鋒一個囡囡,他很感恩:「我個角度係step by step,最初你願意行呢步,下一步就會跟住嚟,我願意接受上天畀我嘅禮物。」

黃澤鋒和太太陳麗麗的二人世界快將變三口家,由於即將多添新成員,夫妻的計劃要重組,「呢年要好努力搵錢,我要再勤力啲,今次太太犧牲大,咁嘅年紀去佗BB,生仔搵命博,唔係輕易事,見佢因為佗B身體變化承受嘅辛苦,過程令我更加了解父母好偉大,我媽咪佗我都好辛苦。」

懷有4個月身孕的陳麗麗,初有孕時患上妊娠濕疹,全身出紅疹,痕癢難耐,黃澤鋒肉赤老婆受苦:「我做唔到啲乜嘢,只係坐喺佢隔籬陪佢,太太好厲害,佢EQ高,我到呢刻未見過佢發忟憎,呢個女人好忍得。我係有脾氣嘅人,由細到大要求完美,我會忟自己,但一定唔可以將脾氣推落佢度。我又幫唔到佢,所以自己唔忍得都要忍。」

一家之主的黃澤鋒表示囡囡出現,變成他們的退休計劃,「我教游水教拳,教學工作可以永不言休,當係經驗。我個人本身都唔停得,蘿柚尖嘅,除咗瞓覺,我成日都會諗啲嘢做。不過為咗小朋友,我哋以後會小朋友行先,我諗好囡囡出世就要買教育基金同保險,萬一我有乜嘢冬瓜豆腐,佢都完成大學,教育係好緊要,唔使佢考第一,但書一定要讀,社會競爭好大,讀過書會令你諗嘢思維好正確,冇讀過就諗嘢到一個位會停頓咗,基礎打得好,樣樣嘢都着數。」

問到陳麗麗有孕後身體變化,她答:「唔係重咗好多,幾KG,佗B易飽,食少咗嘢,有咗之後可能荷爾蒙分泌影響,出咗妊娠濕疹,全身都有,但又唔可以服用類固醇,令我辛苦到瞓唔到覺,好彩呢個幾月開始慢慢減退,痕係冇得忍,有時叫老公同我掃吓背,我諗得遠,我同自己講而家發晒喺我身,囡囡生出嚟冇事,我盡量食嘢小心啲。」黃澤鋒為支持太太,他屆時會進產房打氣,至於將來教女,他們異口同聲謂,黃澤鋒做貓爸,陳麗麗做虎媽。

今年7月囡囡將出世,黃澤鋒說:「我會用開心心情去迎接佢,我鍾意笑,我希望囡囡會遺傳到我啲開心,咁開開心心又一日,做人點會冇憂慮,笑住面對,好多嘢可以解決。」陳麗麗也認同:「笑又一日,喊又一日,點解唔笑住去呢?」黃澤鋒續說:「兩公婆溝通好緊要,回望街外好多夫妻結婚兩、三年,男方已經冇乜嘢同太太講,但我哋結婚都就快十年,我同太太仲有好多嘢講,我有問佢會唔會覺我好煩,我希望我哋十年如一日。」陳麗麗冧笑答:「我唔覺得佢煩。」
場地:The Stadium(觀塘)
(Apple Daily)