藝人蔡思貝同「戀人未滿」嘅余德丞（Dickson）由旅遊節目《緬甸奇幻旅程》開始，一直都以緋聞情侶姿態示人。
Dickson上年踢波突然昏迷送院，思貝更係第一批飛奔醫院探望對方嘅人，關係更撲朔迷離。
遇着今日係情人節，佢哋又嚟料喇！Dickson上載咗兩條片去社交網，忽然打正旗號放閃，為本身今個月6日就過咗佢28歲生日嘅蔡思貝「慶生」，不過佢哋就趁住2月14凌晨孖住過喎！
Dickson大玩「男友視角」，而蔡思貝喺片中表現更加冧到爆，擰晒膊頭又撒晒嬌咁，仲鬼咁cute cute用晒BB聲講嘢。
片嘅後段仲精彩，Dickson趁蔡思貝瞇眼許願時偷偷吹咗佢嘅生日蠟燭，蔡思貝冇嬲之餘又係咁賣萌，情侶Feel甜出Mon！
之後蔡思貝都有轉發啲片，仲嗌Dickson做「錫我的人」，加埋個紅色心心！
佢哋咁閃法，令到網友都𢱑晒頭，個生日過咗咁耐先嚟切Cake，狂問到底佢哋係咪假補祝生日，真慶祝情人節呀？！
(on.cc)
