【搵周國賢幫手】張繼聰冧爆謝安琪!

 

昨日情人節,大家準備甚麼驚喜給情人,張繼聰一向愛整蠱太太謝安琪(Kay),昨日貼出與愛女張靖的照片,祝大家情人節快樂,笑這張相是激嬲老婆系列。

相中見佢拎開張靖的奶嘴,與女兒錫嘴,而張靖相當配合爸爸的鬼主意,嘟嘴錫一錫,阿Kay當然唔會嬲,因為佢當晚即向太太Kay送了一份禮物。

張繼聰昨晚於尖沙嘴海旁,自彈自唱《每天愛你多一些》,當眾向妻子示愛,Kay一臉幸福,場面感人,現場觀眾紛紛拿出手機拍片,張繼聰唱完,全場歡呼大叫「Encore」,他禮貌地歸還結他給歌手,「唔好意思,打攪晒,唔好!唔好!」張繼聰與謝安琪更碰到周國賢(Endy)夫婦,周國賢唱《目黑》贈妻。

張繼聰之後在Ig貼出唱歌片,留言:「老婆話唔要啲物質禮物,但係要難忘嘅冧豬嘅幾十年後都記得嘅,於是我帶佢去海旁,問班年輕人借咗啲架生,講都無人信,仲要撞到Endy同阿嫂,o氹老婆嘅嘢,梗係搵啲志同道合嘅人一齊啦(主要係互相拍片)P.S.十分感謝借樂器畀我哋嘅年輕人s,打攪晒!」他更笑言如果唱得不好,叫大家別介意:「好耐冇試過,邊唱邊淆,誠意搭救,退咗役係咁上下。」

周國賢則在Ig留言:「兄弟,記得對上一次同你喺街Jam嘢,係2003年~!呢16年過得好快~希望下次再喺街同你一齊唱歌,唔使等16年,Love You Bro!」相信周國賢韓籍老婆李美英應該聽到很陶醉。

好友杜汶澤亦有轉貼影片,在facebook寫道:「此舉令我聯想起當年富商劉鑾雄在母親節時,給母親送上私人飛機一架作賀禮,令天下間所有人即時成為不孝子,本人予以強烈譴責,張某把愛妻表現平均線在一夜之間急速拉高,喂!兄弟,畀條路行下好喎!你咁樣我哋好難做人喎!」難怪網民慨嘆「全世界男人都輸了」。

(apple daily)