【唔介意】湯怡:我一廂情願鍾意啫!

藝人湯怡於英皇賀歲電影《廉政風雲 煙幕》演廉署調查員,乃總調查主任劉青雲的下屬,雖然片中僅與青雲有一場對手戲,但足令她心感滿足。由於首度參與如此大製作,再加上有青雲、張家輝、方中信及林嘉欣等影帝、影后助陣,故湯怡也趁機偷師,隔住Mon觀賞一眾帝后晒演技。

湯怡表示拍戲以來,一直喜歡𥄫住個Mon,她謂:「因為同現場睇好唔同,所以唔使拍嘅時候,我會坐喺導演旁邊睇Mon偷師,多數都係睇青雲做戲多,反而同張家輝得一場對手戲。(學到乜?)好難講係一件事,青雲係好好嘅前輩,開頭會畀佢個樣嚇親,皮膚黑又嚴肅,唔太多嘢講,好驚,但見佢同啲化妝、梳頭姐姐又好好傾,我咪企喺隔籬聽囉!」湯怡不諱言與青雲演對手戲時份外緊張,就連對戲時,青雲也感覺到,結果至正式埋位便硬食NG:「青雲有叫我慢慢嚟,所以好想再有機會合作,下次戲份可以多啲,我演奸都得㗎,呢集講因為我而走犯嘛!」

談到與方中信及林嘉欣有場辦公室群戲,湯怡直言對嘉欣的演繹感驚喜,她謂:「因為以前睇佢啲戲係比較弱質同女仔啲,但今次佢一出聲令我呆咗,好硬淨,其實好多時演戲除咗外型之外,聲音都可以配合!(同影帝、后合作,覺得有咩吸引你?)喺演戲節奏、表情上都吸引到,因為電影同電視劇係兩回事。」

講到故事若開拍第二部曲,湯怡即二話不說嚷着想與青雲有感情線:「戲入面青雲同嘉欣好番,都可以有第三者㗎嘛,我一廂情願鍾意啫!暗戀囉,本身我都好鍾意佢,知佢現實生活係好老公,既然戲外冇得發展,就喺戲入面談情啦!(之前你話應該同陳家樂發展感情線,唔驚同佢傳緋聞?)唔怕,我識佢咁多年,上年同佢拍咗三套戲,係再熟絡啲!不過要過電就一早過咗啦!(家樂同青雲揀一個呢?)唔使諗,一定係青雲。」

(on.cc)