【老公Oscar恭喜太太有喜】盛傳造豬B成功 江若琳首現身

    藝人江若琳(Elanne)與老公「生煎包王」蕭潤邦(Oscar)今日現身活動。

     

    昨日Elanne在社交網站上載了一張相,相中的她看來肚凸凸,孕味濃,不少網友都留言問她是否有BB。

     

    (相關新聞:https://goo.gl/g53j5x)

     

    老公Oscar笑言也有份致電恭喜老婆,他們坦言一直努力中,Oscar說:「以前諗住旅行嘅時候努力,不過每次去旅行就頭暈身㷫,所以都喺留喺香港努力,佢成日話生咩生肖嘅BB旺我哋,但我冇乜所謂。」

    今日Elanne澄清:「大家摸吓,我個肚勁扁勁瘦,仲係23吋纖腰,大家唔好誤會,我好努力做運動,明明係瘦咗,唔好刺激我,好多人都恭喜我。」

    Elanne坦言之前想生豬BB,因為旺父母,但發現可能未必趕得切,所以就安慰老公指出年鼠年,鼠BB旺對方。Oscar沒好氣地說:「講到我好失落咁,其實我冇,我身邊好多朋友嘅小朋友都幾歲,如果我哋嘅小朋友出世一定係集萬千寵愛,因為佢係最細,好多朋友都話留BB衫畀我哋,唔使花錢買。」

    Elanne再次強調沒有懷孕,笑謂:「唔好屈我。不過以後影相會坐得好啲。我近年戒凍飲,好多時出街食飯都畀人懷疑我係咪有咗,打邊爐叫熱水飲真係會令人起疑。啲人話依家調理得好啲,將來生小朋友或產後都比較易調理。」

    Oscar指太太以前為工作,不太注重飲食,現在則會多運動及培養良好飲食習慣,但就勸對方不要經常講生仔經,以免給自己造成壓力:「佢經常會諗喺邊度生,請乜陪月,請幾多個鐘,咁反而好有壓力,其實唔需要,生仔要隨緣,我經常同佢講你有咗先諗,但佢就要好有計劃。」

    問到想生多少個小朋友,Elanne認為兩個最好:「一個太孤單,將來我哋有咩事或者百年歸老,佢哋都有兄弟姊妹陪伴,但生多過兩個就搞唔掂。」

     

     

     

     

     

    (綜合報道 / on.cc)

    SHARE