【自爆度蜜月出事】阿嬌:瞓低咗成半個鐘

歌手鍾欣潼(阿嬌)出席品牌活動,講到日前蔡卓妍同容祖兒飛咗去北海道旅行,但就喺社交網話阿嬌「放飛機」…

 

阿嬌解釋:「我冇放佢哋飛機,因為公司幫我接咗今日嘅Job,完全唔關我事,約嘅時候我又唔喺香港,咁我都有屋企要顧住佢哋,我係一個有家庭嘅人。」問到點解唔帶埋老公賴弘國去?佢即話:「唔好講。(下次一齊去囉!)就係因為佢去唔到,所以我冇去。」佢又話遲啲同老公去希臘,同時容祖兒同蔡卓妍都會去。

咁問到依家係咪老公放喺第一位?她說:「大家明㗎啦!(咁係唔係先?)係!咁姊妹都好重要。(但姊妹依家放第二位喎!)唔好咁講,做人好難,老公好重要工作都好重要。」問到幾時幫容祖兒搵番個伴?

佢話:「我好神心幫佢喺金童玉女殿,幫佢點咗個燈,祈求佢成年嘅愛情運,真係好難點,因為要有人放出嚟先有位點到。(好貴?)唔貴。我結婚之前都有點,媽咪幫我嘅,點完之後我就結婚啦。(有冇生仔燈?)咁就唔知。」

講到佢早前患上急性腸胃炎,佢話依家已經好番好多,佢透露早前同老公去咗荷蘭同埋比利時度蜜月,佢話當時流感未清,唔能夠盡興。

「我朝早食咗藥,以為隔咗咁耐啲藥會散,夜晚去咗間餐廳食飯開咗支香檳,點知突然唔舒服要去廁所,去到廁所門口我已經瞓低咗成半個鐘,我老公即刻message問我有冇事,餐飯其實上咗兩道菜,已經食唔到。(老公照顧不周?)佢成日都照顧我,你哋唔好分裂我哋嘅感情。(生B!)調理好啲身體先講生BB!」

 

 

 

 

(ig / on.cc)