【幫B仔沖人奶浴】岑潔儀:追多個女

    岑潔儀(Zoey)一月為長子陳譽昇(Damian)舉行四歲生日會,日前則為次子陳顥昇擺百日宴,BB得意可愛!

    現為兩子之母的Zoey既開心又辛苦,昨晚偷閒到觀塘為好友許嘉浩主持網台節目,之後要趕返家餵哺母乳。

    Zoey更在網上展示幫孻仔沖人奶浴,乳量充足,她笑說:「因為真係好多奶,雪櫃都放唔晒,直接做人奶浴,我胸部唔係好大,但胸大唔代表奶多,細又唔代表奶少,最緊要乳腺通,有時間中出去同朋友應酬食麻辣火鍋或飲咗兩啖酒,啲奶唔可以餵BB,所以索性用嚟沖涼唔好浪費。」

    她生長子時,老公Dixon送贈豪宅獎勵,今次則親自設計一顆戒指送給太太,Zoey笑言:「唔好講咩級數,係有心思嘅禮物,老夫老妻唔使買名貴嘢,有心已經好好,因為生B時老公每晚都陪我喺醫院度過,呢個係我最感動嘅地方。」老爺奶奶專誠由紐西蘭返港過年探一對孫仔,對兩個孫都好滿意。

    Zoey一家三條仔,坦言想追個前世情人給老公,但要抖一抖,隔一、兩年先,她說:「老公係好傳統客家男人,最初一直都話想生仔,生咗兩個後,佢話生個女都好,聽到我都一額汗,始終而家體力冇以前回覆得咁快。」

    Zoey現時進行紮肚修身,紥兩日已可穿回懷孕前的牛仔褲:「開心到想喊!」稍後會和老公到泰國旅行及參加婚禮,希望屆時影到靚相分享。

    擺百日宴當日,還有林芊妤和李美慧,幾位靚媽一齊現身,Zoey說:「我哋現時多咗好多親子樂嘅話題,好神奇,我哋差唔多時間大肚,又差唔多時間生,懷孕時都有一齊去high tea,睇番之前啲相,BB喺肚裏面,之後就已經出咗世,大家關係更close。」身為全職媽媽,Zoey湊仔之餘都想增值,未來會修讀與兒童相關課程。

    (apple daily)

    SHARE