【紅都面晒好開心】洪卓立獲佢送吻超怕醜!

今日(2日)32歲生日嘅洪卓立(Ken)由於有工作在身唔喺香港,趁住壽星仔日前要返公司開會,經理人霍汶希(Mani)夾埋一班英皇娛樂同事提早畀個生日驚喜送Ken。

喺阿Ken唔為意時,一班同事拎出蛋糕,然後大合唱生日快樂,阿Ken即時「紅都面晒」,勁怕醜笑住話:「多謝,多謝。」無諗過會「被慶祝」嘅阿Ken「嚇」到頭髮都豎起晒,Mani見佢個髮型太亂,即刻親手幫佢梳番靚個頭。

除咗有生日蛋糕,阿Ken仲收到老闆楊受成送嘅花,並由集團CEO許佩斯送上。拎住蛋糕許願時,放喺台上面紮花就漏起水上嚟,一班同事高呼:「水為財啊!」相信2019年阿Ken嘅事業一定會風生水起,豬籠入水。

切完蛋糕,Mani先擁抱阿Ken,再送上香吻一個,搞到原本面紅完嘅阿Ken,又即刻變成個「紅番茄」,十分搞笑!

之後其他男和女同事陸續送上香吻,場面溫馨,相信阿Ken一定可以感受到同事們嘅心意!

(on.cc)