【B女眼大大超得意!】原來一早已經結咗婚:好多朋友都鬧我

問到為何選擇於節目上「洩蜜」?他坦言並非有意自爆︰「嗰日係同方伊琪一齊做訪問,佢見到我電話Wallpaper係個BB女,就問我係邊個,咁我又覺得唔需要隱瞞呢個事實,就話係我個女,發生得好自然。」

當初知道「前世情人」來臨心情如何?他微笑冧指︰「就好似係上天賜咗份禮物畀我,依家都盡量抽時間陪佢,發現佢對音樂好有天分,對聲音好敏銳。」

早前於電台節目被爆早已結婚兼有B女的曾航生,再自爆求婚過程極為簡單,但太太加菲仍然冧爆「收貨」,有女萬事足的他更甘願做宅男日對夜對。重提與前女友梁安琪的往事時,他即澄清︰「我問心無愧,清者自清。」

現育有一個10個月大囡囡曾子桐的曾航生接受東網專訪,「從實招來」指4年前與太太旅行結婚,又笑話其節目播出後廣被友人「投訴」︰「好熟嘅朋友先知,其他就喺之後再食飯分享,好多朋友都鬧我『咁老友都唔通知聲?』,多謝大家對我哋嘅祝福,太太係圈外人唔想太高調,我本身個性格又係唔鍾意麻煩人,希望大家多多包涵。」

提起向太太求婚過程,他笑言比起傳統單膝捧花求婚更來得別開生面,全靠一部電話成事︰「好簡單用Message求婚,就同太太講『既然大家都相處得咁融洽,不如組織一個家庭,等我照顧你啦』,之後佢就Say Yes。」

又再爆就連表白都是用同一方法,因為太太是內地人,答應拍拖後一直以Message傳情來維繫「Long D」︰「同太太一拍即合,喺觀點、睇法、性格上都好相似。(歲數相約?)都有少少距離,佢比我後生多少少,但大家都係鍾意宅喺屋企。」

講到與梁安琪的一段情,曾航生坦承比較少聯絡,各有各忙少接觸,對於拍拖時被傳「男靠女」的說法,他列出3點澄清︰「第一,我問心無愧,冇做過呢個事情;第二,當事人都有出嚟講過冇咁嘅事;第三,已經搵咗律師進行相關法律程序,清者自清,真係冇咁嘅事,梁小姐當年亦都係我公司職員之一,另外都有齊所有合約證明支出。」

至於外間有指他跟電視劇《謎》內飾演的角色相似,不時問另一半攞錢,他大方謂︰「代入冇所謂,識我嘅朋友都知我係咩人,唔識我嘅朋友,佢哋鍾意去點選擇,信定唔信,都等佢哋自己去決定。(太太清楚了解?)有同佢講,而佢選擇相信我。」

(on.cc)