【何超盈佗豬仔定豬女?】四太:應該同大家分享

四太梁安琪現身養和醫院探賭王何鴻燊。問到女兒何超盈懷孕,她全程四萬咁口,多次表示好開心,興奮咗好耐!

 

 

 


問到是否贊成生完先婚禮?四太說:「超盈佢想搞婚禮,但我同佢講今年係盲年,我叫佢訂婚先,點知佢講已經求咗婚,亦已訂咗婚。」想女兒生幾多個?

 

四太話:「一個小朋友會悶啲,生多一至兩個,我已話我湊,佢話要諗吓,我都唔後生會比較緊張。(你想霸住個孫?)係呀!(你好忙?)我係忙,咁忙法我都會開心,會重新分配自己時間。」

問到未來女婿已見過賭王?佢話:「佢有見過,佢哋想低調,你哋唔好令到佢咁緊張。(煲湯水畀佢養胎?)屋企工人由細湊到佢大,日日都有煲畀佢。(所以發福?)佢哋拍拖都開心,係美滿。」

 

問到正日生日怎樣慶祝?她說:「我唔知依家點,到時間等佢畀個驚喜我,都係朋友一齊食餐飯。(外國搞婚禮?)佢諗住去外國,咁葡萄牙屋企都十分好,佢有佢想法。(叫佢減少工作?)佢依家都冇返工,屋企電腦都做到,佢有一班好伙伴幫佢手。」

問到是否忍咗好耐唔講?她說:「唔係忍咗好耐啫,開心事應該同大家一齊分享。(生豬BB?預產期幾時?)大家知多過我,男定女未知,佢話我生日畀個驚喜我,可能到時話我知男定女。何生已知道喜訊,超盈好多朋友都知,希望大家唔好騷擾佢,等佢多啲休息。」

 

 

 

 

 

 

(on.cc)