【冇表白】靚靚冧到暈:錫完梗係唔止咁簡單

內地熱播真人騷節目《妻子的浪漫旅行》第二季愈爆愈多料,繼日前章子怡自爆父母當年強烈反對佢同汪峰拍拖,搞到要「偷情」咁見面之後,就輪到袁詠儀(靚靚)大爆當年同張智霖(Chilam)一吻定情嘅過程!

靚靚話佢哋兩個喺北京拍《邊城浪子》嗰陣第一次單獨食飯就係打邊爐,仲話係自己約Chilam在先添,又抵死手握拳頭笑話︰「睇到好嘅(對象)就梗係要(出手)!當時都冇諗佢有冇鍾意我,係後嚟拍戲慢慢發現呢個男人唔錯。」

正所謂「男追女隔層山,女追男隔層紗」,靚靚話約咗幾次食飯之後,就喺12月31號就正式喺埋一齊,不過出奇地兩個人係跳過表白環節︰「嗰晚係除夕夜,香港搭正12點所有車都會一齊響喇叭,咁就好正常會講新年快樂,就喺佢送我返屋企嘅時候,我哋就喺車入面錫錫,但錫完就梗係唔止咁簡單啦!」

之後發生咩事?靚靚就冇講落去嘅,但睇佢冧到爆嘅樣,就肯定係啲Sweet爆舉動,閃到啲網民個個都話要戴太陽眼鏡呀!

相關新聞:【講到Chilam都眼濕濕 袁詠儀雙眼通紅:以後我一定會跟着他】https://goo.gl/u6ybjj

(on.cc)