天后容祖兒（Joey）壓軸登場《KKBOX香港風雲榜頒獎典禮》，以螢光黃色西裝打扮的她自嘲是螢光棒，再配襯一身晒黑的健康膚色兼纖腰，更Sharp醒！
講到近日好姊妹鍾欣潼（阿嬌）自爆替Joey於金童玉女殿點燈，祈求愛情運，Joey聞言即大笑話要多謝對方：「咁頻撲、粗重，多謝佢都嚟唔切！佢真係好得意，又可人，雖然呢啲嘢我唔係咁信，但佢係比較緊張少少，成班都皇帝唔急太監急，只要見到有未婚、年齡合適就話好，不過有時見到佢哋咁都好開心，尋日睇到篇文章話同朋友見一次少一次，都即刻約出嚟。」
Joey更自爆曾玩過網上相睇Apps，實行出齊所有「法寶」：「成班餓狼傳說咁，但我係靠實力！（幾時有男朋友？）就嚟！轉彎就到！逼到我就嚟要登報紙招親啦！覺得呢刻幾好，但期待更好！」
最近與前韓國天團Big Bang成員勝利合作新歌《Pretty Crazy》的她，原定會於典禮上與勝利首度合唱新歌，惟對方近日捲入醜聞，日前更突然透過IG宣布退出演藝界，亦隨即決定取消來港計劃，故Joey要獨自完成演唱。
韓國天團Big Bang成員勝利最近宣佈退出娛樂圈，震驚全球！
受訪時Joey無奈指當收到消息後感到好愕然、好可惜，並宣布是次合作要叫停：「過去呢個月佢都好忙，我覺得好遺憾，對我嚟講佢係一個好有才華嘅藝人，自己都好期待同佢合作，呢刻希望佢快啲冇事。（合作去到邊一部分？）我就錄好音，佢都有參與，但後期有好多製作，例如混音佢就冇可能繼續，原本佢係會參與多啲，依家冇合唱版都好可惜、好可惜，計劃趕唔上進度都冇辦法。」
問勝利宣布退出演藝界前可有預先通知？
Joey坦言沒有，又自言不應要多說下去：「佢哋公司都唔希望我講太多，可以講嘅到呢度為止。（有聯絡對方？）佢都好忙，有透過佢嘅同事表達對佢嘅祝福。」而新歌將變成以獨唱形成於4月頭推出：「始終都係一首好好嘅作品，花咗好多時間錄音、排舞、仲拍咗MV，係得我自己嘅。」
(綜合報道 / on.cc)
