【童年回憶返晒嚟!】當《閃電傳真機》遇上⋯⋯

藝人黎芷珊尋晚獲當年兒童節目《閃電傳真機》嘅一眾主持人,好似有譚玉瑛、麥長青、蓋世寶、鄧健泓等,同佢補祝53歲生日。

而同一時間地點,無綫經典處境劇《卡拉屋企》吳鎮宇、鄭敬基、楚原同黎海珊同樣為盧宛茵慶祝66歲生日,真係約都冇咁啱喎!

兩班人難得見到面,當然唔少影大合照啦,場面相當熱鬧!蓋世寶喺社交網留言送上祝福:「今晚實在是一個輕鬆又愉快的聚餐!還巧遇多位前輩呢。芷珊姐姐生日快樂啊!」

《卡拉屋企》係好多人嘅童年回憶,日日都用電視汁撈飯。
事隔廿多年重聚啦!一齊賀盧宛茵生日~
出席嘅有吳鎮宇、黎海珊、鄭敬基、楚原夫婦,席間眾人談笑風生、訴說當年情,84歲的楚原仍舊精神奕奕!

黎海珊表示:「早排傳《卡拉屋企》重播,大家就決定聚一聚。特別揀咗尋晚,因為係肥媽(盧宛茵)生日,難得鎮宇咁啱由大陸返嚟。(大家都好嗎?)老竇(在劇中飾演白頭佬的楚原)身體好好,肥媽喺8月開首次個唱,佢好緊張同興奮,大家都好雀躍,約咗一齊去捧場。」

吳鎮宇就話:「大家拍完個劇之後,都無冇再見面,今次再見番,感覺好得意,大家都好似以前一樣咁亂噏。(大家都想去捧盧宛茵場?)係呀,希望到時可以啦,因為真係唔知當時個期做緊啲乜嘢。」

(綜合報道)