藝人陳凱琳（Grace）上月為老公鄭嘉穎誕下囝囝Rafael，不經不覺寶貝仔已經一個月大。
之前就曬過卡通版一家三口照，今次係真人版！
今日Grace喺社交網分享一張一家三口全家幅，相中嘉穎抱住囝囝，兩公婆仲齊齊錫BB個面珠仔，成個畫面勁有愛！
此外，枱上放有一個兩層高嘅生日蛋糕，蛋糕上更有網球拍等裝飾，睇嚟佢哋都想囝囝大個似爸爸一樣熱愛網球！
Grace以英文留言：「你是我們生活中的光明和幸福，我們會做任何事情讓你安全，受保護和被愛的！Happy 1-Month Old Baby Rafa！」
為咗同大家一齊分享喜悅兼Sweet吓，嘉穎同Grace仲派糖畀朋友們，盒糖上有張心意卡寫住「Welcoming Rafael to the Cheng family & Blessings from us to you（歡迎Rafael降臨鄭家，我哋為大家送上祝福）」，相當溫馨。
之前已經勁有心思整有鹹蛋嘅豬腳薑，盒中間貼有「鄭」字，而盒上面有一個大楷黑色立體英文字母「R」代表住囝囝Rafael，隔籬仲有隻可愛嘅豬仔雙手拎住個粉紅「LOVE」嘅愛心，代表囝囝喺豬年出世！
(綜合報道/on.cc)
