【好多時候都係被分手】張衞健:但都唔及個心咁痛

    藝人張衞健(Dicky)之前返回無綫拍《大帥哥》大受歡迎,最近他就去到學校,向年青人分享人生遇過的挫折。現年54歲的他經歷過大起大跌,其中提到在事業低谷時,女友都離他而去。

    他一開始就笑言:「喺愛情方面,好多時候我都係扮演被分手嘅角色,你唔信呢!靚仔如我,只能夠講佢哋唔識貨,講笑啫!雖然我係演過韋小寶,但其實私底下現實嘅我,喺愛情方面,好多時候都係扮演被分手嘅角色。」


    他自爆當年拍戲跌斷手,要入院做全身麻醉手術,之後醒番,但當時的圈外女友劈頭第一句竟要與他分手,原因是不想將來嫁給他後,買個名牌手袋都要等半年。他又提到曾有另一個女友嫌棄他冇錢而分手:「佢話我連自己同屋企都未養得起,如果同我結婚,我點樣養我哋嘅家庭?」他坦言事業低谷時完全沒有伴侶支持。

    東網致電Dicky時,講到當時圈外女友在他手術後分手,他坦言:「當時真係非常愕然,佢咁樣同我講,我做完手術個傷口痛,但都唔及個心咁痛。(當時有冇諗過自殺?)冇,反而下定決心,第日搵個女朋友唔可以咁注重物質,慶幸依家另一半(張茜)唔係咁物質嘅人。」

    而提到另一個圈內女友也叫分手,問到可是江欣燕或宣萱?

    他表示:「唔係佢兩位,呢兩位喺我冇乜信心時都畀支持我。(咁係邊個圈中女友?)唔講,時間已過去,我做分享係希望畀正能量年青人,特別近日又有兩個學生自殺,想將過去嘅經歷,同佢哋講面對挫折都唔好咁易放棄,要將憤怒、悲傷嘅感受放慢,咁樣先可以過到難關。」

    相關新聞:【曾畀躁狂爸爸虐打 張衞健:當年諗幾時會畀佢打死呢?】https://goo.gl/UyCo7M

    (on.cc)

    SHARE