【患自閉症仔仔升中一】陳錦鴻:唔想讀書就唔好讀

藝人陳錦鴻與劇集《婚內情》其他演員為ViuTV節目《Good Night Show發洩擂台》擔任嘉賓,他透露患有自閉症的兒子將升中一,近月忙於為他搵學校:「要拜託人搵學校,同埋同佢練模擬面試。(成功咗未?)搵咗好多間都唔成功,不過其實我最想喺8歲開始打擊佢,培養佢逆境處理,調適佢點樣面對負面情緒。」

他亦謂人最怕被人揀,自己都是:「所以我先一簽TVB就簽好多年,拍戲都係一簽就拍9部,我都好想個仔訓練到自己,我同校長講,就算個仔唔成功都好,但我都想畀佢試下有second in,想畀佢有個成長過程學習。」

問到阿仔可有得着?他說:「佢呢3個月成熟咗好多!成個人長大咗兩、三歲,雖然佢長期失眠,因為會緊張。(佢有冇同你哋講會失落或唔開心?)我哋一家人正面面對,陪佢一齊預備面試,一齊睇新聞,又會搵老師幫佢補習英文同普通話,大家一齊陪佢面對壓力同支持佢,等緊唔使到廿幾歲先經歷呢個階段,希望大家都知道雖然件事重要,但唔係一定會得,盡咗力就得。」他又謂阿仔現時已會自己一個睡覺:「本身想佢12歲生日先咁樣畀佢學習獨立,依家就早咗幾個月。」

開明的他又謂跟阿仔講:「如果唔想讀書就唔好讀,搵間渣啲嘅學校都得,去到15、16歲出去做嘢都得,我仲好,唔想使咁多錢同佢補習,所以係佢嘅選擇,只要佢選擇咗,父母就會盡力配合佢。」他又坦言湊仔的滿足感大過拍戲:「因為佢唔係個個都聽教,我係其中佢會聽,同埋依家生活冇壓力,冇咁多煩惱,做到想做嘅嘢,所以我同多年前個樣都冇分別。」

 

 

 

 

 

(on.cc)