【佗雙胞胎?】大肚何超盈挺孕肚孖未婚夫送Surprise畀四太

四太梁安琪今日58歲生日,一班仔女齊集為佢慶祝生日。四太梁安琪率先於晚上6時50分乘坐七人車抵達,她以粉紅色外套配鮮紅色頸巾,Sharp爆現身。

 

心情大靚嘅佢全程保持笑容,又多謝記者祝她生日快樂。問到賭王送咗咩禮物,她笑笑口未有回答。至於問到超盈會送上咩Surprise,佢就表示:「你問番佢啦,佢已經送咗最大嘅禮物畀我。(依家講得超盈佗仔定佗女未?)你問番佢啦。」然後步入餐廳。

 

 

 

及後早前承認有孕、並表示將會喺媽媽生日送上Surprise嘅大女超盈,亦喺孖住未婚夫Thomas Xin現身餐廳。佢哋乘坐七人車抵達,貼心嘅Thomas先行落車,再慢慢扶住超盈落車。以Cap帽、黑色口罩同連身衫嘅超盈,一見到記者即上前打招呼。問有咩Surprise送畀媽媽,超盈話:「一陣先講啦。」然後再摸肚話:「呢個已經係最大嘅禮物。」而Thomas雖然未有回答問題,但亦保持笑容,盡顯紳士風度,之後,超盈喺未婚夫陪同下步入餐廳。

晚上約8時,四太大仔何猷亨亦手持一大紮鮮花同紙袋到達,並表示係送畀媽媽嘅禮物。

之後細仔何猷君亦緊接現身,而遠在美國就讀麻省理工學院嘅四太19歲細女何超欣,亦專程長途跋涉返港為媽媽慶生。見超欣以短褲仔晒腿上陣,青春逼人,愈大愈省鏡。至於問到猷君女朋友奚夢瑤可會出席,猷君則點頭微笑未有回答,並孖住超欣步入餐廳。

接近晚上9時30分,超盈與未婚夫率先離開餐廳,再問到送咗咩Surprise畀媽媽,超盈話:「遲啲會喺ig公布。」而未婚夫小心翼翼扶住超盈上車離開,認真貼心!

有網民就見超盈孕肚好大,身形又發曬福,估計佗雙胞胎喎!

喺生日飯局中,四太一口氣切咗五個蛋糕,最特別嘅係,其中一個蛋糕係何超盈代腹中嘅BB送上,以賀準外婆生日,認真有心思!

呢個粉紅色嘅蛋糕上唔單寫着「Grandma Angela(Angela係梁安琪嘅洋名)」,蛋糕上仲有5個非常可愛嘅BB糖膠公仔,公仔BB嘅衫顏色有粉藍色同粉紅色,其中着粉藍色衣服嘅BB公仔比較多,估計超盈佗仔機會相當高!

接近晚上十一時,餐廳嘅職員先把禮物同鮮花,放喺四太嘅座駕,由何猷亨陪同四太離開,問到生日願望,四太話:「身體健康。(賭王送咩畀你?)秘密。(超盈畀咩驚喜你?)佢頭先冇講咩?你哋問佢啦!」

 

 

 

 

 

 

 

(on.cc)