【將老婆陳茵媺放第一位】陳豪:用一世時間畀幸福佢

藝人陳豪今日以代言人身分出席健康食品活動,受訪時講到老婆陳茵媺再次於IG放閃,上載陳豪單人照大讚相中人靚仔,又懶神秘叫人唔好同老公講,因為驚陳豪妒忌,不過陳豪竟懵然不知,笑笑口自言Old School,比較少睇IG…

廣告

「只會出Post,但我有進步,好似媽咪咁識用電話上社交平台。(覺得好甜?)絕對啦!佢係我嘅Angel,難得娶到個好老婆,喺事業高峰期嘅時候同我生咗3個小朋友,試問有幾多個做到?所以我會記住,用成世嘅時間畀幸福佢!將老婆擺第一位!」此番「愛的宣言」簡直Sweet到爆!

廣告

講到代言廣告中有一男子滑浪畫面,陳豪否認是自己,不過就自爆曾是澳洲Beach Boy:「我有好多好威猛嘅滑浪相,唔係流㗎!(幾多年前?)嗰陣囉,哈哈!塊滑浪板都有帶返香港,初期都有滑浪,但依家塊板就放咗喺大浪灣。(寄存咗好耐?)耐喇!畀心機做嘢唔再掛住玩。」

續坦言現時湊小朋友為主,要幫手睇功課、教小朋友讀書寫字、發掘興趣:「做家長唔容易,都會被考起!會同佢哋一齊做,就好似上次囝囝份功課係要整西多士畀媽咪食,我示範一次畀佢睇,佢再跟住做,有拍埋片證明係囝囝自己做。(好食?)其實我廚藝OK㗎,兒子學到幾成已好叻,哈哈!」

另外,提到活動司儀為森美,令人聯想起二人的「HEHE情」,記者本想邀請森美一齊受訪,但被他以「輸陳豪幾條街」婉拒,陳豪笑指對方太謙虛:「佢做MC畀到好多歡樂,見到佢即刻陽光晒!(佢又係你Angel?)佢係陽光男孩!相信我哋開套搞笑版《斷背男》都唔會畀人鬧,我哋兩個加埋一齊最好玩!」

 

 

 

 

 

(on.cc)