袁偉豪與張寶兒感情穩定，不時傳出婚訊，就算去到巴塞隆拿旅行都唔會偷懶。
早前Ben就上載同Bowie喺當地海邊跑步嘅短片，一路跑得快嘅Ben都遷就番女友嘅步伐慢慢咁跑。
跑完後，Ben仲喺海邊做引體上身，體能不輸同場嘅老外！
袁偉豪與張寶兒在將軍澳出席無綫劇集《鐵探》記者會。
問到去巴塞隆拿旅行可有順道拍攝婚紗照？
他說：「其實今次係為《使徒行者》電影版去歐洲宣傳，趁有時間自己去巴塞隆拿玩兩日休息一下，影婚紗相就要搵人幫手先得，唔通自拍咩，你當我去睇景啦。」
問到張寶兒將來影婚紗相會否選擇在巴塞隆拿？她說：「本身都鍾意歐洲，以前都喺英國讀書，都想佢睇吓。」問到會否揀好教堂準備結婚行禮？袁偉豪說：「隨心，不過，喺教堂做呢件事分外有感覺，會好莊嚴、感人。」
是否已求婚？他說：「未，上次攞住嗰條係草嚟嘅，唔係戒指，呢樣嘢唔可以草草了事，再畀啲時間我，享受依家所有嘅嘢先，人哋個寶貝女嚟，求婚要係誠意嘅表達，再計劃吓。」張寶兒亦幫口說：「畀啲時間佢，唔係淨係結婚咁簡單，佢本身都有負擔。」
袁偉豪與張寶兒在《鐵探》中飾演上司下屬，張寶兒說：「同場都係佢指揮我，我都只係答Yes，Sir！平時就冇咁順攤。」
袁偉豪則透露平日他會說：「寶寶，你唔好咁啦。」
講到收視，袁偉豪對劇集充滿信心，因有惠英紅與姜皓文等強勁演員坐陣。
(綜合報道/on.cc)
