藝人林師傑同歐陽巧瑩（Tammy）於上年結婚，人緣甚佳嘅佢哋婚禮獲不少藝人朋友畀面出席。
琴日Tammy於社交網晒凸肚，留言：「好多人問我係咪失左（咗）蹤？好多人見我剪左（咗）頭髮，就問我係咪有好消息，係咪造人成功？」
「好多人見到我肥左（咗）就恭喜我 😅😅😅…我宣布 今日正式減肥😎 唔好再恭喜我，唔洗（使）讓座比（畀）我，因為我真係單純地 肥左（咗） 😊 好多磅#愚人節快樂#我冇大肚」
網民都紛紛留言送祝福，歐陽巧瑩仲笑言自己目測五個月，究竟係咪真係有喜做準媽媽呢？
有傳媒聯絡到歐陽巧瑩，問佢係咪真係有喜，佢就答係真係肥咗，係時候要減肥，仲自爆肥咗15磅添！
(綜合報道)
