【傷上加傷】朱晨麗頸椎嚴重移位

無綫藝人朱晨麗(朱朱)近年備受無綫力捧,先後參與多套陣容强大的劇集,早前播出的《兄弟》已經好博命…

連月來全力拍攝新劇《法證先鋒IV》,雖然該劇尚未煞科,但她已投入另一套新劇《大醬園》的拍攝,工作一浪接一浪。朱朱透露日前發現手肘劇痛,後來發現手肘甩骹,但《法》劇煞科前,她還要忍痛參與一場天台救人戲,而拍攝飛身救人時不慎傷上加傷,撞瘀小腿上五吋下五吋的位置。

朱朱因手肘甩骹去睇針灸時,醫師為她檢查,發現原來她的頸椎嚴重移位,她說:「醫師問我係咪撞過車,我話冇,醫師好奇怪問冇撞車,點可以歪成咁?醫師好好,幫我針灸又啪骨復位。」她透露手肘甩骹是舊患:「加埋之前有啲動作場面,所以傷上加傷。我只係睇到一次醫生,覆診都冇時間,依家患處仲隱隱作痛!因為依家忙緊拍《大醬園》,希望呢一、兩日可以再抽到覆診啦。」

談及天台戲,朱朱表示要克服心理障礙,危站39層樓之高,期間還要飛身撲救僅穿剩Bra的企跳女子。當日由於天氣轉冷,現場又大風,令凍到腳震震的她「禍不單行」,撲救Bra女時不慎撞到小腿最痛之處。

今次作自我挑戰,鏡頭前型到爆,但朱朱即淆底說:「其實真係好驚㗎!冇遮冇擋企到咁高,風力又大,仲要喺圍邊衝過去救人,雖然有威吔,真係都腳軟,係咁叫自己唔好向下望,唔好四圍望,集中精神救人,不斷叫自己克服,好彩只係NG幾次就搞掂,我都幾滿意呢場戲。」

而談到拍攝《法》劇,她笑言自己練成「金剛身」:「呢套劇經常連踩十幾、二十個鐘,好多日只係瞓幾個鐘,或者只夠時間返屋企沖個涼,休息一陣又要繼續。(點樣捱得住?)靠意志囉,不過能夠拍部好劇,辛苦啲都值得嘅。」

 

 

 

 

 

(綜合報道 / on.cc)