【用唔完美去成就完美】楊千嬅感動到喊:其實我好脆弱

廣告

楊千嬅日前到珠海舉行「MY BEAUTIFUL LIVE楊千嬅世界巡迴演唱會」,第二站巡演獲《春嬌與志明》好姊妹谷祖琳、林兆霞及陳逸寧專程去捧場。今次的場館是在戶外體育場,當日天氣欠佳,滂沱大雨,兼有雷暴警告,令千嬅擔心不已,幸好在正式開騷前十分鐘終於停雨,千嬅說:「最驚係冒雨唱歌會有觸電危險,因為以前試過被咪電到手,又擔心台下觀眾淋濕身,知道停雨嗰刻心情真係開心到大叫咗出嚟。」

廣告

Encore時,《小星星》前奏音樂響起之際,全場觀眾相當配合打開手機燈,千嬅看見眼前一片星海,感動流淚:「多謝你哋,好靚呀!我第一次喺自己個舞台度得到好多小星星,都唔算太遲。」台下有觀眾大叫:「終於等到你嚟到珠海呀!」千嬅哽咽着說:「我咁樣好難搞喎!有冇人可以畀張紙巾我呀?」

觀眾的喝彩聲此起彼落,千嬅說:「上次喺廣州做真係好驚,因為我第一次做室外演唱,仲要咁多人,某程度我個膽好大,心口掛個勇字,其實我好脆弱,你哋唔信呀?咁我係咪要繼續唱?定要繼續喊?咁我成晚喊,好過唱係咪?我會記住呢個畫面好靚,我已經印咗喺個我腦入面,希望我唔好咁快有腦退化就可以一直記落去,因為我記性好差,頭先出場見到你哋舉紫色棒時我又發台瘟喇!我想唱多次水瓶座得唔得呀?會唔會好麻煩?我成日就係話用唔完美去成就完美,頭先發一句台瘟,我會覺得好唔完美,個心會梗住,畀我唱多次會好啲,我哋一齊唱,我一生都會記住你哋畀咗咁好嘅回憶我。」

珠海雖然是第二站,不過千嬅已經有捨不得的感覺,忍不住吐心聲:「我突然好感動,點算而家?雖然係第2場,點解好似好唔捨得咁,呢件事對嚟講好變態,但係我好開心,開心得嚟又有眼淚,係咪因為年紀大咗呢?」千嬅自言歌曲記載着人生路上不同階段的自己,多年來經歷不少痛苦失敗,有時突然會唱到哭,穿越了24年,希望未來繼續得到大家的陪伴。

稍後千嬅還有深圳、佛山、澳門及北京等地區的巡演,其中深圳站首日開售即爆滿,將會加開一場。

(apple daily)