【杜汶澤被爆…】田蕊妮:男人係唔會大,年紀會大但未成熟

藝人田蕊妮(阿田)今日上電台宣傳新歌《最親》,她坦言是送給媽媽的禮物:「個MV出咗街都有好好嘅反應,請咗鮑姐(鮑起靜)做媽媽。(冇乜佢正面鏡頭?)專登㗎!MV想用媽媽嘅背影,講小朋友由細長大,然後媽媽老。」續指媽媽教了她好多人生知識,特別在媽媽由生病至離世階段:「急速成長、成熟,有好多嘢因為佢而睇透咗,好彩嘅係我捉緊到機會喺佢離開之前有機會明白、了解佢。」

阿田又話「媽媽」這個角色對仔女來說既最親又最矛盾,因為媽媽會無私奉獻出愛及照顧,但就往往令仔女覺得是「老奉」、理所當然,不懂去珍惜:「有時媽媽講嘅說話未必係我哋最想聽到,但言語中嘅關懷、愛係最大。(媽媽對你講過最深刻嘅說話?)同佢鬧交都好記得,所有嘢都好懷念,最深刻係MV入面嗰句好真實嘅對話,媽媽有日同我講『阿女我已經準備好』,但我話『吓?但我未準備好』,呢句說話印喺腦海入面,其實每位媽媽喺我哋未出世就作好最大準備,去照顧小朋友。」

問到是否一直都不敢做媽媽?她直言唔好住:「唔係唔敢,係冇我媽媽咁偉大,我都仲係自私。(老公杜汶澤都未Ready?)佢應該係未大,仲要啲時間去長大,男人係唔會大,年紀會大但未係成熟。」

至於對老公近日拖程美段糧一事,阿田即封口話沒有回應:「要處理都處理咗。(佢有冇爭你家用?)冇,我哋財政好獨立!」

 

 

 

 

(facebook / on.cc)