前港姐朱晨麗（朱朱）同何廣沛緋聞傳出多時，雖然曾被拍得互餵蛋糕、雨中漫步，似足拍拖咁，但兩人都否認戀情，不過今日何廣沛就突然喺網上叫對方「畀次機會」佢呀！
朱朱喺Instagram上載一段片，片中主角何廣沛被打格，佢充滿感情求「復合」：「你畀次機會我呀！」
朱朱就好冷淡回應：「唔畀！」男方就好激動：「點解呀？我好好㗎喎！」朱朱就留言：「當你唔鍾意一個人嘅時候，可以選擇咁樣做！」而陳煒都忍唔住留言：「比（畀）次機會佢啦」
另一邊廂，何廣沛喺同一時間上載男友視角片段，佢話：「我唔鍾意你，我Blur咗你！」再留言：「愛既（嘅）反面就係恨，反轉豬肚就係朱晨麗」
兩人公然耍花槍，網民都話「快啲拉埋天窗啦」、「真係冧到痹」、「明明就係好鍾意」、「黐線咩，公開撒狗糧好飽啊！」
其實佢哋最近再合拍無綫劇《大醬園》，飾演一對歡喜冤家，大結局有親密場面，何廣沛錫伊人面豬添，唔知喺現實中幾時修成正果呢？
(IG/on.cc)
