【網民大讚好催淚】《鐵探》蔡思貝演技大躍進!

    無綫熱播劇《鐵探》好快就大結局,早前一集飾演心狠手辣Madam Man一角嘅惠英紅演繹喪子Matt Sir(楊明飾)之痛大獲好評,網民仲話要推佢攞視后!正當大家都focus喺紅姐爐火純青嘅演技,另一主角招喜悅(蔡思貝飾)嘅演出同樣獲網民讚精彩,仲話佢成功洗底呀!


    最新一集,講到與楊明陰陽相隔嘅思貝拎住束花去到海邊悼念對方,細數兩人嘅經歷:「到我同佢講我鍾意佢,佢唔理我,再到今日,佢終於捉住我隻手…捉住我隻手…同我講,佢話佢唔需要其他人,淨係需要我…」

    一字一句都有淚,而思貝演繹就情感變化層次分明,愈講愈激動,喊到成面淚水…鼻涕都流埋出嚟,睇到人心都痛埋!

    思貝亦喺Instagram抒發:「一個人不愛你; 不疼,不慘。最可憐痛心的,是愛到你的性命也可以給他的時候,他突然離開。」網民都紛紛嗌好催淚「這場戲真的看不下去了 演得超好的❤」、「點解唔可以同Matt開花結果」,大讚佢演技愈嚟愈進步、好入戲!

    而痛失摯愛嘅思貝,因為幾宗塵封姦殺案勾起創傷後遺症,原來佢童年遭綁架並困喺木箱內7日,仲險被強姦!最後,喺尚垶(袁偉豪飾)幫助下,思貝決心面對心魔,終於能夠走出陰霾。

    喺2015年無綫劇《衝線》中,思貝首次擔正但形象同演技都不太討好,把聲嘈到令觀眾想熄電視機。

    但喺早前《大帥哥》一劇,演技明顯改變令網民慢慢對佢改觀。

    如今喺《鐵探》中,演技再躍進,睇嚟佢嘅付出係有回報嘅!

     

     

    (on.cc)

    SHARE