【之前被爆明年秘婚】高海寧:楊明莊思明一齊做姊妹

高海寧(高Ling)和楊明今日為了劇集《婚姻合伙人》到商台接受訪問,兩人笑言近日頻頻宣傳,互見對方見到悶。楊明提到前晚參與遊戲節目,自稱是豬隊友,因只懂拍戲,高Ling笑說:「夠啦,生到咁嘅樣,靚仔高大仲唔夠呀?」提到兩人被刻意塑造為螢幕情侶,高Ling即說:「暫時網友都好buy,但只限於螢幕。」似是向男友鄧智偉派定心丸。

對於有傳高Ling與男友鄧智偉將修成正果,明年於歐洲秘婚,高Ling再三為結婚傳聞解畫,她說:「知道雜誌跟咗我2日,但出到嚟內容冇樣真先至勁!可以做編劇,我當日去咗超市買芝士同蛋糕,但佢哋又冇出,又話我去影樓影結婚相,其實當日係去影寵物雜誌封面,遲啲大家會睇到。我去巴塞羅那係工作,又話我去順便睇場地,仲話Ali(李佳芯)幫我手睇場地,講得太完美好假,但好多朋友都問我,我解釋番唔係,大家唔好咁心急啦,都多謝佢送咗個封面畀我。」

身邊楊明笑言覺得報道十分「全面」,高Ling承諾若果真的結婚,楊明和女友莊思明一齊做姊妹。

高Ling指媽咪從來沒擔心她嫁唔出,但現時並冇計劃及承諾結婚,並說:「講到生日飯當晚好多花係求婚成功,乜咁兒戲咩?」被指自築愛巢出嫁,高Ling大反應地說:「我個租客即刻搵我問係咪要收番間屋,我同佢講放心住,唔會收番層樓住,即使日後結婚都唔會住呢度啦,會住未來老公仔到,我唔係形容一個人,係形容未來老公。」並否認貼錢出嫁,她更着大家不要亂寫,要為她澄清。

觸及婚事又燒到楊明,他表示近年多番被催婚,會抱一貫作風以工作為先,他說:「最低限度要顧及好自己屋企父母先可以諗自己家庭,而家會拍劇、生意為主。自己入行21年,雖然曾經定下目標,但唔係想像中咁樣,細個時又懶惰,而家唔會set定日期做乜,每日做好自己。」

(apple daily)