【關智斌霍汶希楊受成等到賀】昨晚擺酒恭喜晒!

    容祖兒昨天早上在IG story上載風和日麗相,寫住「BIG DAY」及婚戒的圖案。

    祖兒再於IG上載多張照片,見她飲弟婦茶時非常冧,她更感動落淚!

    其中一張更見她踩上「新床」,未知是否恨嫁想沾旺氣呢?

    祖兒昨天榮升「大姑奶」,其胞弟容逸恆(Samuel)與拍拖多年的「翻版阿嬌」女友Samantha Lee!

    她留言:「今天是我家大日子,我大頭細佬娶靚老婆啦!畢竟這一生也只有這一次的經驗,所以當下我真不知道應該用怎麼說話來形容這當下的心情。」見到弟弟的長大成人,她十分感動:「從小到大,我希望看到這位和我血脈相連小男孩,可以一天一天的成長,成為一位有責任,也有能力照顧自己,也能照顧別人的真漢子!」最後她更催細佬快啲生B!

    相關新聞:【興奮到轉晒圈 原來容祖兒「雙喜臨門」!】http://bit.ly/2EUp1YT 

    昨晚舉行喜宴~因容祖兒的弟弟是圈外人,且出席婚宴大部份來賓都是圈外人及雙方親友,出席喜宴的圈中好友不多,包括有老闆楊受成、經理人霍汶希、好友關智斌及填詞人黃偉文等,雖然大喜事,但表現得相當低調。

    在擺喜宴的酒店大禮堂,約四時許已開始布置,旋轉樓梯綁上汽球,有電蠟燭及粉紅及白色的玫瑰花,還有Samuel和Samantha相擁的結婚相,營造出浪漫溫馨的感覺。

    祖兒身穿黑色貼身大露背長裙現身,提到之前已送了樓給細佬的她,問再有送咩畀細佬?她說:「酒席,同埋細個已經送咗隻錶畀佢,叫佢第時結婚戴,今日佢就戴咗。」

    講到榮升大姑奶的心情,她說:「多咗一個特別嘅身份唔識點形容,今晚參加個Party,成個婚禮都係由細佬佢哋一手一腳策劃,佢話唔使我幫手,佢成熟處理得好妥當,我尋晚心情都冇話特別激動,不過就開心,呢個小朋友我由細睇到佢大,到佢今日成家立室,覺得好感動,佢終於大個仔,好大嘅高興,佢可以搵到一個人生嘅伴侶。」問到斟茶時可有感動到喊?她說:「有啊,大妗姐叫我講祝福說話,我就同細佬講要互相愛護、互相照顧,我都冇講啲乜但已經有啲眼淚,就係血濃於水嘅感覺。(唔捨得?)又唔會,係多咗個屋企人,佢會令家庭愈嚟愈強大,最好有咁大得咁大。」她又謂媽咪都很開心:「最開心佢哋搵到一個人互相照顧,媽咪又放心。」

    她表示筵開20多席:「唔算好多,但由細嘅場地轉去大嘅場地,本身諗住簡單啲,但唔掂,所以去大啲。」她透露好姊妹Twins不在香港,關智斌剛收工趕來,公司同事都有來,因他們由細睇住細佬大,及一些親戚朋友。問可會上台唱歌?她說:「冇呀,我迫細佬表演佢唔肯,佢話好大壓力,我覺得我今日唔出聲好啲,靜心感受婚禮喜悅。」問到今晚可會不醉無歸?她說:「一滴不沾,因為啱啱好番,我唔使飲酒都可以好High㗎。」

    經理人霍汶希出席容祖兒細佬的婚禮,講到祖兒榮升大姑奶,她說:「係呀,佢好開心,笑咗好耐,因為佢好錫細佬,佢哋自細同媽咪相依為命,佢哋感情特別好。(佢會唔會唔捨得細佬結婚?)佢好開心!依家多咗個新成員。」她又謂今晚是簡單和溫馨婚宴,故祖兒應該不會唱歌:「佢忙住招呼賓客。」

    問送咩畀細佬?她笑言:「都係好老土咁帶咗一抽金豬送畀細佬,陣間幫佢戴上去,因為見新娘心口同成隻手都戴滿晒龍鳳鈪,細佬應該冇咩人送嘢畀佢,所以就送畀細佬。」問可有趁機向祖兒催婚?她表示:「唔使催,順其自然,最緊要佢遇到鍾意嘅人。(幫佢物色好男仔?)有呀,幫下眼咁,但唔戥佢心急,因為佢性格好得人鍾意。」

    而老闆楊受成、唱片監製舒文亦有到賀。

    另外,霍汶希在社交網上載和身穿大露背裝的祖兒合照,以及一對新人向老闆楊受成斟茶等的相片,留言:「恭喜祖祖榮升大姑奶,金鳯榮升奶奶,仲有恭喜細佬娶老婆。」

    問到關智斌送了甚麼?他說:「其實好尷尬,有啲倉促,其實我喺香港拍緊劇,之前祖兒叫我嚟,但我未應承實,到今朝見到佢個post,就醒起原來係今晚,本身我係開緊工嘅,即刻問佢仲有冇留位畀我,所以收工過嚟,但就準備唔切禮物,但人情就會做到足,補數。(幾足?)講出嚟就冇意思啦。」


    講到祖兒榮升大姑奶,他笑言:「戥佢高興,佢想做長輩好耐,如果佢細佬生埋,佢就做姑媽,希望佢可以快啲做埋姑媽,希望容家快啲開枝散葉。」問到可會介紹男仔畀祖兒識?他笑言:「佢介紹我先啦,大家都介紹吓,盡早脫單。」

    (綜合報道)

    SHARE