藝人唐詩詠、林子善、黃嘉樂、鄭嘉穎同馬國明因拍攝劇集《鐵馬尋橋》而結緣，成為好兄妹，多年嚟關係都一直咁Close！
呢日佢哋又有聚會喇，就係為上個月頭生日嘅唐詩詠，同埋上上個月中生日嘅林子善補祝生日，鄭嘉穎仲帶埋老婆陳凱琳現身，而黃嘉樂個攝影師女友Samantha都有出席。
雖然馬國明有事未能參與，但幾兄妹聚首都一樣難得。
約成半年都未夾到期，真係好誇張！網友都話：「上次鄭嘉穎個仔百日宴欠林子善，今次欠二佬馬國明……幾時先齊人呀？」
唐詩詠留言：「多謝咁多位阿哥同阿嫂，約左半年都未齊人。要維繫一段友誼唔容易，以後靠BB，要珍惜每一個moment！」
而林子善就留言：「補祝妹妹日日開心快樂😘👍鐵馬兄弟係乜都可以講🤨👍喊就一齊喊笑就一齊笑！大哥穎已變成慈父一個。」此外，Samantha更公開踢爆黃嘉樂嘅小機心：「有人又買自己最愛嘅杧果蛋糕去賀人生日，其實自己終於又有藉口食。」認真搞笑！
(綜合報道 / on.cc)
