【呢方面勁過老婆】陳柏宇突然自首:佢前所未有咁喊

歌手陳柏宇(Jason)出席網上音樂Live節目宣傳新歌《金草莓》,講到他幾乎每日都同愛女Abigail開Live,問到開Live是否得心應手?他笑言:「每次開都係餵緊佢食嘢,都唔會點理個Live。」

續指阿女比較黐老婆,不過於某方面就比老婆超班。

「我有錢過佢!喺我、老婆、囡囡之中,老婆喺呢段關係略勝一籌,但同銀行嘅關係我係略勝一籌,不過老婆同銀行嘅關係都好好嘅!」

為培養同囡囡感情,Jason指去旅行都不失為一個好方法,而剛從日本回港的他卻突然自首話唔小心整親愛女:「擺咗部電話喺架BB車嘅車頂,跌落去撼到佢個頭,佢前所未有咁喊,我就前所未有咁抱住佢。」

愛旅遊的他更計劃定下一次旅行的目的地共享天倫之樂:「再去泰國,呢啲地方唔會有好勁時差,佢比上次已經唔怕熱,但都仲係驚草同游水,可能泳池水凍,不過好得意嘅係佢好鍾意沖涼!」

講到父親節將至,問到首次以爸爸身份過節會怎樣慶祝?

他表示會同屋企人食飯:「咁啱嗰日放假。(自己買個蛋糕慶祝?)都可以!想畀Abi『奶』吓海綿蛋糕。(期待佢大個親手整禮物畀你?)冇諗到咁遠,但收到會好窩心,同埋都幾有紀念價值,會儲起佢,就唔會咁快唔記得。」

(on.cc)