【學生:16年我所學所知的原來是假的】一班香港媽媽對「母親論」聯署回應

立法會原定昨日恢復二讀《逃犯條例》修訂草案,大批市民於早上衝出龍和道及夏慤道,佔據馬路。示威者與警方下午爆發激烈衝突。警方將示威定性為暴亂,出動布袋彈、橡膠彈、催淚彈對付手無寸鐵的示威者,至少72人受傷。

教協昨日亦宣佈,由於現時社會氣氛正急劇惡化,發動本周全港罷課。

廣告

 

廣告

100毛的腦細林日曦更收到一個媽媽send給他的錄音,內容是其16歲女兒參與示威的感受,仍未成年的她站上前線返送中,聲嘶力竭哭喊:

「我今日是其中一位參與示威嘅人,我有一群朋友大家都係10幾歲,今天(6月12日)出來唔係為咗打卡、唔係因為朋友輩影響。點解我哋不顧一切、不顧自己嘅安危走出嚟?係因為我們喜歡香港呢個地方,相信香港係一個自由嘅地方。政府會聽我哋嘅意見,但原來唔會!

6月9號、103萬人上街,林鄭月娥可以將所有上街嘅人講嘅話、所表現嘅唔當一回事。唔緊要,我就當你認為我哋唔夠堅持,我們今天再出嚟。

一開始我都唔敢落馬路,只敢喺天橋睇住示威者喺樓下,我知道自己好軟弱,我喺嗰一刻真係覺得自己好無助,我喺天橋上睇到喺另一邊嘅馬路,有一位婆婆,70幾80歲都願意出嚟,為乜嘢呀?唔係為咗自己。

我作為一個中學生,跟同學冇做任何暴力嘅行為,而警察不斷發放催淚彈,知道我當時身處邊度嘛?係示威區。唔單止一個催淚彈,大家都好大聲,叫你停止!話畀你哋知我哋已經撤退、要求你唔好再放啦、走緊啦、疏散啦。點解你哋仲要不斷用催淚彈?你知道嗰度有幾多年輕人?有幾多老人家?幾多社工、基督徒?幾多人走出來?

我喺香港生存咗16年,唔能夠話好長,但至少呢16年都令我明白香港嘅核心價值喺邊度,係因為我哋有自由,係因為我哋以為我哋喺被施壓都可以有出嚟抵抗、出來集會嘅自由。但原來冇呀,16年我所學所知嘅所有,原來係假!

我哋一班同學全部都好好,唔顧自己先保護女仔,我真係好欣賞佢哋。但你哋到底知唔知道佢哋幾多歲?同我差唔多大咋,你知唔知道我有幾慚愧、自責?

可能你哋唔知道催淚彈係乜嘢感受,係好刺痛、好似全身都被火燒咁。我一邊走嘅時候,睇見喺更前嘅人,真係痛到只可以坐喺地。嗰時我喺商場裏面,仲有好多催淚彈嘅味道,示威者真係走唔到,只能大叫、問有冇水?有好多比我做得更多嘅人,仲喺四圍問示威者需唔需要生理鹽水洗眼、幫受傷嘅人洗。

我呢一輩都唔會忘記,最冇辦法忘記嘅唔係催淚彈有幾嗱眼、有幾辛苦、 有幾窒息。我最記得係點解一群上街,喺前線嘅人被整到昏迷,佢哋乜嘢都冇做!到底點樣?唔通喺香港言論自由都咁奢侈?唔通連申訴自己嘅不滿,都係犯罪?」

這段錄音引起好多網民共鳴,至今帖子已有近兩萬次轉發,1600個留言,當中不乏學生哥和父母。

她的媽媽今早託林日曦回覆大家:

「謝謝你,睇佐D留言,阿女一路睇一路喊,今次係感動嘅眼淚,佢覺得自己為上街為關心香港的同伴講出心聲,而原來有好多港人都好有愛,爸爸話佢今早喊住返學考試!謝謝大家!」

「我早上一早就上班了,昨晚臨睡前我和她亦再度傾談,佢思想都挺成熟的,而這次的經驗對她而言獲益良多,知道香港有很多有共同信念,共同願景的香港人!而且在此之前,她對自己的學業很緊張,緊張到我們怕她面對不起明天的DSE,但昨晚她親口說她開始釋懷,開始覺得DSE沒有那麼可怕!」

「謝謝各位,有你們讓我女兒,我們的下一代沒有陷入絕望!」

———————————————————————————————-

一群香港母親亦對今次事件亦有所回應,如下:

特首林鄭月娥今天在專訪中以一個關愛孩子的母親自比,並認為她在百萬人遊行反對「逃犯條例」的修訂,數以萬計的年輕人走在抗爭最前缐下,堅持修例,是不想縱容「任性」的孩子。

我們是一群香港的母親,但我們絕不會以催淚彈、具殺傷力的橡膠子彈及布袋彈攻擊我們的孩子。我們也不會看到年輕人在警棍下血流披面仍無動於衷。

何況人民不是特首你的孩子;人民不需要你的施捨,只要你作為一區之首,作為一個公僕,用心聆聽各方聲音,並作出適當、適時的回應。

要多自大的人,才會覺得103 萬人的訴求是「任性」的?

要多自大的人,才會覺得三千名法律界人士的擔憂是「任性」的?

特首也是二子之母,如果你以愛自己孩子的心,以同理心想一想,現在走在抗爭最前缐的年輕人,他們的父母有何感受。

特首,香港的孩子不用你作他們的母親。他們要你當一個負責任的政府領導人,積極回應巿民大眾反對「逃犯條例」修訂的訴求,立即擱置或撤回條例。

我們這群母親,正在為孩子的美好將來而努力,希望孩子在自己的家園生活,有免於恐懼的自由。現在我們以香港市民的身份,以人人平等的尊嚴,請你把政治公關技倆放下,以行動證明你真心關愛我們的年輕人。

 

一班發起人更希望於12點前收集更多媽媽的聯署,連結如下:

https://docs.google.com/forms/d/e/1FAIpQLSd1lZ8ssqRHd9URksA1QInt-oF4JH8O1ajCtz-JENBg_nQIjg/viewform

 

 

 

 

 

(facebook)