【Jazz都有捧場】蘇永康講到TVB抽安心水:唔可以逃避同驚

歌手蘇永康在紅館舉行一連兩場演唱會,尾場獲謝霆鋒、張衞健、關之琳、徐濠縈、蘇志威、劉浩龍、湯寶如、汪詩詩、鄧萃雯、劉倩婷、Eric Kowk夫婦等到場支持。

 

跟頭場一樣,他跟大家分享上半生的音樂歷程,又繼續邀得彭家麗及胡定欣做嘉賓。

騷後受訪時,他透露其實公司年年都有問他入不入紙,直至前年與中樂團合作過後覺得好好玩,所以就嘗試今次的紅館騷。問到今次可會有巡迴?他表示有些困難,因為最貴是樂譜,而每個地方唱的歌亦會不同:「每份譜要成兩萬蚊,所以今次都使幾多錢,咁多首歌,成本唔會平過平時嘅騷,好貴,所以多謝公司畀我搞。」

講到兩歲的囝囝Jazz亦有來捧場,他笑言囝囝睇了三場:「因為前日綵排都有嚟睇,今日晏晝我仲帶咗佢上台感受吓,但佢企咗喺度,然後就捉住我老婆隻腳,因為佢驚,所以我都影唔切佢上台嘅相。」

他亦表示爺爺、爸爸及自己都是玩音樂,不知道將來囝囝可會玩埋一份,但希望他的天空會更大,不只是紅館。問到完騷可會放假?他表示:「抖一日,之後就返去拍《娛樂大家》,之前完騷都仲會去旅行,依家湊仔返學仲好。」

至於提到BIG FOUR中,唯獨許志安未有現身支持,而提到《愛.回家之開心速遞》對安仔偷食事件抽水,他坦言:「我唔知呀,雖然佢收視好高,不過我好少睇。(覺得重提件事會唔會唔係咁好?)冇話好唔好,如果編劇勒住,就會影響創作自由,呢件事大家慢慢會淡,絕對相信安仔會勇敢面對,就好似我自己件事(台灣涉毒),唔怕人提,唔可以逃避同驚,反而要去面對,所以冇話(抽水)啱唔啱,網上咪仲離譜。」