【會喺香港補擺喜酒?】陳法拉婚後首現身笑得超甜

藝人陳法拉5月18日和法籍男友Emmanuel Straschnov在法國舉行婚禮,宣布正底升呢做人妻!

呢日首度在港現身,於銅鑼灣出席品牌活動,穿上米白色套裝的她一臉幸福分享新婚喜悅,雖然沒有戴婚戒,但甜蜜笑容已印證一切。

台上她多次表示新婚生活很開心,見到佢笑得咁甜都feel到佢幾咁幸福~

法拉說:「新婚當然好開心,而家回復正常生活,我哋喺法國舉行婚禮後,大家都返回自己嘅崗位,冇咩特別。婚禮後我都好掛住香港朋友,之前都有派餅畀香港親友,亦有keep番啲報道,好有紀念價值。」成為人妻後覺得時間十分寶貴唔夠用,法拉憶述:「好奇妙,尤其結婚當日眨下眼就過。」被問到人生重要時刻?法拉坦言:「結婚當日同埋紐約茱莉亞學院取錄我一刻。」

法拉又分享婚禮上喜悅,她表示雖然在法國巴黎只舉行小型婚禮,只有屋企人和親友百幾人參加,但溫馨又搞笑:「我哋冇搵人安排、設計,好多都係自己準備,所以好緊張,中西式儀式同晚宴都有,嗰日好快就過咗。」

說到婚禮上老公有否說愛的宣言,法拉說:「食飯時佢話要講段說話,我初時以為佢同大家講,但佢用國語同我父母講,意思大約係會照顧我,對我好,我冇諗過佢會當眾咁講,所以好感動。」她又指婚宴上父母好開心,更有跳舞,她謂:「第一次見我爸爸跳舞,我媽咪係跳舞老師,當時佢跳到拱晒橋、扭腰,仲瞓晒地。」

法拉今次只短短返港幾日,老公沒有同行,她說:「下次有機會希望帶佢畀大家認識。」又坦言已習慣新婚生活:「同老公認識三、四年,早已習慣兩人生活,轉變唔大,但有時改唔到口叫男朋友,要叫老公,係呢個字眼未習慣。」婚後老公繼續在紐約工作,而法拉則香港紐約兩邊走,下月會回港客串一部電影。問到法拉若需要長時間在港工作,另一半可以隨時做跟得老公?她說:「佢好鍾意香港生活,亦都識得中文,成日問我有冇機會到亞洲或香港工作,唔使安排佢都會跟住我過嚟,佢亦都好鍾意電影,幾年前追緊我時都有嚟睇我演出嘅舞台劇。」

她表示不會在港補擺酒,問到有否被父母催生B,她謂:「過吓二人世界先,依家計劃緊度蜜月,大概十二月啦!想去南極、南美洲咁!呢啲第日帶唔到小朋友去。」昨日她沒有戴婚戒,笑言自己專業,免得搶了手錶活動風頭。

(綜合報道)