歌手陳柏宇（Jason）自從Abigail出世後，每次出活動做訪問都事必會提起萌B，IG仲任PO愛女嘅相，真係不愧為「愛女狂魔」！
仲揾埋女女一齊賣廣告！
又成日喺IG分享女女近況，見到Jason落盡力咁幫女女體驗「過山車」、「咖啡杯」、「海盜船」同「碰碰車」，原來就係為咗TUM女女開心，Abi都玩得好HIGH！
眨下眼Abi就10個月大，仲開始對世界產生好奇，坐喺Play Zone嘅Abi竟然「自殘」，喺隔籬嘅Jason舉機影低整個事發經過添！
見Abi喺條片入面一直想扯右腳隻腳趾公落嚟，下下都好重手，仲屢敗屢試，好似完全唔覺痛咁，Jason睇咗陣都忍唔住出聲勸阻囡囡，笑住話︰「抆唔甩㗎啦，黐住咗喺腳板度呀隻腳趾，抆唔甩㗎，你點試都抆唔甩㗎啦，你信我啦AbiBu，唔會抆得甩㗎！」相當搞笑！
而Abi聽到爸爸嘅笑聲，先望一望Jason，然後竟然將行動升級，捉實成隻腳板想扯出嚟，認真估佢唔到！但試多兩試，Abi開始發現唔對路慢慢放棄，仲用隻中指指住隻腳趾「抗議」，搞到Jason笑爆嘴話︰「咁又唔使出中指！」笑死成班網民！
（IG / on.cc）
