【生女後蛇腰再現】關心妍巡演同囡囡着親子裝

    歌手關心妍(Jade)入行18年首個內地巡唱《時刻觸動巡迴演唱會》,本周六(7月13日)將於廣州舉行首站,同時宣布10月26日舉行深圳站。

    曾兩度搭上紅館的關家姐,距離上次個人演唱會已經相隔五年多,每次開騷前,她都會操到自己最fit,最瘦時期更只有96磅、22吋腰。早前努力7年用盡偏方造人,當時她經常買廉價補品,持續服食中藥調理身體,每日食去核紅棗,並要求老公每日飲馬卡水,有助補腎,增強力氣造人,三年前終於生了女兒楊榮心(心心)後,她便減少了運動。

    為了這次巡演,她再次踏上跑步機,更成功追回23吋腰。她說:「要好多謝Kenneth陳華國,上次《說》嘅演唱會都幫我造咗幾套靚衫,今次所有服裝都係由佢負責,啲衫好靚、門票都賣晒,為咗報答歌迷,呢幾星期再減多幾磅,之前應承大家嘅23吋腰都做到了。」

    對於女女7月23日就3歲生日,她特意在這次演唱會帶心心到場欣賞媽咪演出,仲特別訂製了一款親子晚裝給女兒。Jade說︰「演唱會最後一part係送畀女兒,Kenneth話要造一套親子晚裝,畀佢着上喺台下為我打氣,我哋都係第一次着咁隆重嘅母女裝,Kenneth好認真,要我帶心心一起去fitting,幫心心度身的時候,同佢講媽咪會着呢套衫上台唱歌,因為心心未喺現場睇過我開騷,佢問可唔可以唱兩句?之後大家拍掌起哄,心心見到大家咁熱烈即刻怕醜freeze咗!」

    女女咁可愛,唔知會唔會繼承媽咪衣缽做個唱的歌手呢。

    SHARE