兩位港姐馮盈盈同麥明詩喺《後生仔傾下計》中，周不時都會爆出激烈言論。而日前嘅一集中，主題圍繞補習，兩位讀書出眾嘅主持就大談經驗。當中麥明詩仲大談幫人補習嘅價錢同經歷。
節目一開首，馮盈盈就話麥明詩喺呢方面專家，話佢幫人補習經驗豐富，讀大學時兼職幫人補習，每一小時收費$1000，身價超高咁話，明詩就估唔到自己係「身價」高過馮盈盈咁話！
收$1000一粒鐘，在坐嘅後生仔聽到都愕然，反問麥明詩補咩學科要收呢個價錢，佢笑住話就話：「我個履歷寫咗，你鍾意叫我補咩都得，總之比錢就得。」
雖然麥明詩讀女拔，當年會考仲攞到十優佳績，但原來佢都幫襯過中文科補習天王蕭源，佢仲大爆對方把自己個中文名隱藏喺範文，排版後就會見到蕭源兩個字。麥明詩又透露佢最弱嘅係中文，不過「中英文真係唔係靠補習，係靠由細到大浸淫同寫文。」
講到點解啲學生需要補習，有後生仔話：「如果學校搞得掂，根本無人需要出去補習，雖然唔係話學校老師廢……」而係有學校只係注意考試成績，但都有啲學校較為注重傳授智識，而補習社係教應試技巧，」麥明詩聽到唔多認同，仲反問：「點解要講得咁婉轉，我覺得直情係廢」。講到咁激，唔知大家點睇呢？
