飾演「細龍生」嘅鄭世豪係《愛．回家》入面通常都西裝骨骨，形象深入民心，今次搞乜整到周身傷呀？
原來藝人鄭世豪早前為無綫劇《唐人街》開工，今次角色與同《愛．回家之開心速遞》「細龍生」完全相反，除咗要跛腳同要踎街之外，仲比人打到周身傷，大考世豪演技！
佢話：「呢次拍劇嘅角色叫畢易，人如其名，個角色生活唔容易，係一個流浪街頭收買情報嘅人，好多謝監製畀咗一個咁好嘅角色我，好有發揮性，亦可以同好多好戲之人好似陳展鵬、唐詩詠、前輩秋姐（元秋）等合作，呢次演出係我演藝路上其中一個重要嘅角色。」
不過因為鄭世豪「細龍生」角色太深入民心，他啱啱開工時成日被人開玩笑：「咦？細龍生被老竇趕咗出嚟，搞到生活要咁陰功，又污糟又成日畀人打，哈哈！」認真搞笑！
（on.cc）
