被封「新一代世紀賤男」的藝人張致恒（Steven）嘅偷食緋聞愈揭愈多，有傳佢除咗「一腳踏五船」，早年同莊端兒拍拖嗰陣，先後劈腿藝人蔣家旻同啱啱離婚嘅裕美，其中蔣家旻情傷喊自殺，傳同前夫分開嘅裕美當時又同母親不和，要暫居狄以達喺九龍灣嘅公司，咁啱遇着冇水沖涼，Steven就趁莊端兒離港公幹，誠邀裕美回家沖涼兼過夜，女方更值「女性周期」，雙方依然有親密行為，整污糟咗床單！
裕美接受訪問嗰陣大斥報道離譜：「嘩，呢單嘢完全係作我出嚟，好離譜，雖然我曾經喺九龍灣間公司住過，但唔關無水事，無水我唔識去附近搵地方涼沖咩？裏面啲嘢（報道）好多都唔關我事，點會有血漬上床呀，大佬，唔好玩啦，關我咩事，我識得佢耐啫……」
原來裕美當年15歲就喺同公司嘅藝人聚會入面識咗啱啱約18歲嘅Steven，兩人都係基督徒，成日都會喺教會見面、傳福音、做見證。裕美話：「連教會啲朋友、莊端兒都知我哋識咗好耐，我同莊端兒都見過面。」雖然曾是成日見的熟朋友，但大家近年就比較少聯絡，知道對方工作忙又拍拖。
被問到Steven可有曾展開追求？佢指兩人視對方如兄妹，並強調同Steven無嘢，叫大家唔好諗咁多：「唔好係仔都關我事先得㗎！如果有嘢一早有咗啦，無咗依然都無嘢啦，我唔覺得同佢有嘢囉。」
講到Steven「一腳踏五船」，佢表示唔關佢事，仲大讚Steven為人幾親切，又無所謂，無論對佢定教會啲弟兄姊妹都好好。被問到最近可有聯絡Steven，她表示過往有咩事都會傳短訊俾佢，但今次就唔想煩佢，只可以為佢祈禱，無乜嘢可以做到。」並認為Steven「可以處理得好好多」，打算再過一段時間再揾佢，免被誤會八卦。
（on.cc / Instagram）
