影星吳鎮宇同張家輝喺新片《使徒行者2諜影行動》再結片緣，鎮宇飾演家輝同古天樂嘅師父，但動作戲欠奉，以內心戲居多。佢自嘲年紀大未能應付大量動作戲，因此交由兩位「後生仔」上陣。
講到上集與佘詩曼有感情線，鎮宇坦言今集原定有安排，但最終向導演反映希望唔好再搞咁多男女感情：「今次係男男，好熱血。大家知我講嘢直，我唔認為觀眾可以容忍到我，唔會同佢兩個撞到啲嘢。」
面對鎮宇嘅率直，家輝忍不住笑對方夠『癲』峰：「今次個角色係要佢呢啲咁『癲』峰嘅人先處理到，平時又代表晒我想講嘅嘢。喺片場我好鍾意鎮宇，因為當我見到有少少睇唔過眼嘅事，通常睇多次先，但呢個時候佢已經起火，快過我出聲，我不知幾爽同心涼，件事最終又解決，係咪好開心先？」果然係聰明人識得觀察情況！
鎮宇聞言即笑住反擊：「佢呢啲咪陰濕囉！有啲嘢係同一表達，同一情緒，但佢個樣生成咁Mean（刻薄），我就大方得體幫咗人哋，分分鐘話我意見畀得好添！」兩人真係好有默契〜
兩人都曾做導演，被問到會否攜手合力執導？家輝坦言有唸過合作喜劇：「劇本難搵過導演，因為唔笑就係乞人憎，界線幾危險。」仲建議幕後新人一定要拍社會問題做提材：「電影好廣闊，天馬行空都可以發生，可以係悲情片、愛情、喜劇，即使王晶式喜劇都可以有新睇法，有好橋我唔介意合作。」相信觀眾都想有多啲好電影欣賞〜
（on.cc）
