藝人黃建東大前日（26日）過38歲生日，獲眾多圈中好友祝賀，先到莊思敏旗下餐廳同何艷娟、張名雅、翟威廉、周志康等食午餐，夜晚再同母親及細佬同埋莊思明、簡淑兒、蝦頭（楊詩敏）、蔣家旻、蘇韻姿、陳婉衡及劉晨芝等喺好友嘅別墅食晚飯慶祝。
佢表示：「平日喺公司開工各有各忙，就算食個飯都要趕頭趕命，難得生日晚上可以約到大家舒舒服服咁坐低食飯傾偈，真係好開心好Relax，蝦頭就算夜晚有事做都特登趕過來，好多謝佢哋每一個都咁有心百忙中抽空過來食飯。」
東東亦搞笑表示黃媽媽非常省鏡，同一眾女星合照毫無違和感，真係風韻猶存喎〜
相入面東東更獲眾女吻賀，非常有艷福！
東東透露每年生日願望都係希望減肥成功，雖然距離目標愈來愈遠，但今年仍會繼續希望自己成功減磅。另外，佢今年憑着二次創作陳偉霆嘅廣告再度熱爆，佢除咗希望自己演技同演藝事業上可以更上一層樓外，亦希望可以繼續度多啲橋拍多啲搞笑片，令人睇完可開心同放鬆一啲。好呀，等你！
（on.cc）
