現年66歲的「靚聲王」張偉文（Donald）早前被傳精神有異，成日大吵大鬧又胡言亂語，同平時溫文有禮嘅個性判若兩人！有消息指由於佢病情持續，最終被強行送入精神病院，留院期間情緒失控情況未減，更曾試圖偷走！
佢受訪嗰陣直認5、6月曾入住威爾斯醫院，醫生指佢腦有瘀血要做手術，將會有短期性（失憶），所以住咗十幾二十日院，又指自己並非患精神病，醫生亦覺得他冇大礙，只是記性較差：「記得遠嘢，唔記得近嘢，依家仲有呢個情況，要去睇醫生。」
被問到點解記憶力變差？，Donald似乎「搭錯線」，突然講起有次往羅湖過關返深圳寓所，喺斜路連人帶輪椅「炒車」，手術後醫生叮囑佢唔好再跌倒，佢表示只跌過三次同接受三次放瘀血手術。再問多一次佢終於成功回答：「無話唔認得人、唔記得人，啲醫生護士我認得嘅，記憶最終都會記得番，係要耐少少時間。」
訪問中段，Donald突然又「記得」入住過九龍醫院，連同住得較長時間的威爾斯，前後入院約兩個月，留院時曾出現幻覺，坦言感覺好模糊：「有時覺得我喺台上做緊騷，但醒番就知自己做緊觀眾，（跟住）又喺度揈頭， 但唔知點解咁，芭蕾舞呀！睇我身形點跳芭蕾舞？」佢估計因醫院有芭蕾舞團演出，可能想跳埋一份嘅心理影響下先覺得自己係台上一分子。
期間仲大呻遭護士綁手綁腳，張偉文話佢最不開心嘅係俾朋友當佢「黐線」，並認為醫院唔需要將佢變「大閘蟹」，覺得係唔人道嘅對待，搞到啲朋友嚟探佢都覺得佢癲到好嚴重咁。佢隨即「勸喻」去醫院嘅人千萬唔好聽話坐低︰「一坐就好快綁住你，一行就要連櫈行，好辛苦！」令人聽到滿頭問號？？？
至於點解會被綁， Donald先認衰指係「貪玩」，笑言同醫護玩「鬆綁遊戲」：「佢哋好興唔畀你走就綁住你，一見到嗰條粗帆布，就要出動我帶嘅鉸剪仔，最慘就係要收喺腰，你知我條腰咁粗，把鉸剪現出嚟好覺嘛！」並表示每當護士巡房時，會閃身出現嚇人，其後同醫護混熟先免受被綁之苦，他可憐地說：「開頭成日綁住我㗎！（有掙扎？）有。（兩間醫院都綁你？）九龍醫院冇綁得咁犀利。」
問到出院後可需服藥，他竟又話毋須覆診同食藥：「醫院唔係咁贊成你食精神科（藥物），除非好嚴重。」他話療程已完成，腦部已無瘀血，醫生曾帶佢睇電影，再問劇情以測試其思維及語言能力，佢話：「已測試過我冇『癡癡呆呆』！」
對於張偉文嘅情況，其形象設計師兼歌手好友方俊接受訪問，代友澄清：「佢係住過威爾斯，但（另一間）唔係九龍醫院，係沙田醫院，佢唔係精神病！佢話做過三次手術，其實只做過一次，喺腦開咗三個窿，可能佢開咗腦，有啲『斷片』，加上受麻醉藥影響先記錯，但佢依家好番九成，無事。」佢認為Donald被傳患精神病，或因住院期間經常偷走，被護士綁住時大發脾氣有關：「嗰時佢真係好大反應，好癲㗎！我受唔少。」
方俊指Donald入院全因揸電動輪椅開得太快而「炒車」所致， 事發當日Donald從深圳回港去咗東區醫院睇感冒， 但返到香港喺火車站出事：「撞到電輪椅翻晒，四腳朝天，車站啲人Call白車送入院，檢查後先知佢個腦積咗瘀血，但可能同之前跌過幾次有關，所以咪做手術囉！」由於Donald的身體狀況不宜再跌，他已為對方安排入住護老院方便照顧：「間院舍喺我屋企樓上，萬幾蚊，住單人房，雖然佢初時唔願意，但好過佢返深圳，佢習慣咗（院舍）又成日自己揸輪椅車落樓下食茶餐。」
（on.cc）
