【錢嘉樂爆做跟得男友】袁偉豪掛住陪張寶兒拍戲?

藝人袁偉豪(Ben)及錢嘉樂到電台宣傳電影《使徒行者2諜影行動》,嘉樂表示電影剛剛上映:「聽樂小姐(樂易玲)講大陸已經有1億7千幾萬票房,係個幾好嘅開始。(慶功未?)未,我哋兵分幾路,我哋做電台宣傳,佢哋就有啲去咗馬來西亞宣傳,其實我哋前幾日都齊人喺北京宣傳。(之後有其他宣傳計劃?)未計劃,等佢哋安排。」Ben就表示有兩場動作戲和一場文戲,其中一場動作戲在緬甸,一場在香港:「香港嗰場就講我畀人KO中槍走咗,今次有得再參與都好感恩,我好投入成個製作過程,就算冇我嘅戲份都會喺片場睇。」

嘉樂就踢爆Ben特登陪女友張寶兒到西班牙拍戲:「明明得兩日戲,但佢哋就去咗10日。」Ben就表示去學嘢:「因為咁啱工作未有安排,所以就去睇吓佢哋點拍,感覺都好新鮮,因為我啱啱入行就係拍劉偉強嘅戲多。」嘉樂笑言:「講笑啫,佢唔係淨係陪女朋友,見佢成日睇住個mon拍成點。」

Ben又表示今次與古天樂、吳鎮宇、張家輝都有戲份:「有場跟佢哋開會,睇三位影帝埋位前勾心鬥角,多多錢都買唔到,喺現場睇佢哋做戲,其中就同古天樂多啲戲,佢好Nice,佢見我唔好意思行過去睇mon,就叫我坐過去,佢一嚟到就會破冰,叫我唔使怕醜。」

問到電影可會參加影展?嘉樂表示一定要:「今次都係第一次有外國電影喺緬甸拍戲。(可會參加內地金雞獎?)唔知道,都交番畀公司內部決定,身為製作電影人就想乜都參加。(內地電影唔可以參加台灣金馬獎,你覺得可惜?)希望淨係做好電影,其他都唔好去掂。(成個行業變得好尷尬?)希望香港電影做番自己。」

 

 

(on.cc)