【4歲囡囡學人拍拖】梁浸浸姊弟戀見埋家長!男朋友仔仲叫錯名

    藝人鄭希怡(Yumiko)個女「梁浸浸」雖然只得4歲人仔,但已經多才多藝。

    依家人仔細細,仲已經學人「拍拖」見埋家長添!到底梁浸浸嘅「男朋友仔」係邊個?

    原來係無綫節目《東張西望》主持嘅容羨媛個仔!容羨媛今日喺社交網分享3歲囝囝Fraser拖實梁浸浸嘅相,留言:「👦🏻:媽媽,我女朋友暖暖!🤦🏻‍♀️:人哋叫梁浸浸唔係暖暖呀!」佢仲講明以上對話係真實對白添!

    除咗拖手相之外,容羨媛仲公開埋兩小無猜嘅攬攬片,睇見都覺得Sweet呀!不過網友就搞笑留言:「哎喲…梁浸浸會叫非禮㗎🤣🤣」

    此外,原來「見家長」呢一日容羨媛係帶咗一對仔女同陳小春囝囝Jasper一齊去室內遊樂場放電。

    佢仲幫三個小朋友影咗唔少合照,見張張相入面Jasper嘅甫士都唔一樣,相當搶鏡!

    連容羨媛都忍唔住話:「Jasper就好似漆黑中嘅螢火蟲一樣,無論去到邊度…個pose都一樣咁耀眼! 🕺🏻」

    梁浸浸咁快大個女,唔知鄭希怡有咩感受呢?

     

     

    (on.cc)

     

    SHARE