【花比別人多十倍努力】陳偉琪感恩遇上「細龍太」一角 擺脫性感形象

    藝人陳偉琪(Vicky)2013年參加港姐及藝訓班入行,因身材出眾而受到關注,但同時成為負擔,經常要飾演賣弄身材的角色。

    對此,Vicky亦大感無奈:「條路唔係我揀,新人唔會推嘢做,有咩角色都會接,都有想放棄同沮喪嘅時候,我花嘅時間要比別人多十倍,因為其他人會覺得你所有嘢都係身材而得來,而唔係你努力。」

    但原來只要堅持下來,終會柳暗花明,Vicky幸運地遇上「細龍太」一角:「當初因為我識彈鋼琴,所以搵我客串一場,後來編審記得我拍過第一輯《愛.回家》,於是就寫咗個角色畀我。」

    「個角色有啲乞人憎,初時有網友話見我出場就想熄電視,依家演變到覺得我幾搞笑,甚至同情我。行到呢步好幸運,個角色完全冇騷身材,畀觀眾有另一個感覺。」

    Vicky稱笑言「細龍太」最擅長鬧人,但這正是自己的弱項:「我係完全唔識鬧交,我好嬲只會走人,唔會花唇舌去鬧人,所以經過長時間練習,我依家先可以一輪嘴去鬧人。我成日都好擔心,會問對手我咁做係咪over咗定係唔夠惡。」

    早前Vicky衝出香港參加「WCOPA」世界表演藝術錦標賽,她稱要多得「細龍太」:「好多嘢係環環相扣,因為呢個角色有啲noise,令我有動力去參加比賽,想畀大家睇到唔同嘅自己。」

    比賽令Vicky重拾對豎琴的熱情,而過程中,最大感觸是母愛的偉大:「當年我哋喺加拿大生活,媽咪一個女人仔,又唔識英文,佢要喺加拿大幫我搵個豎琴,安排好多嘢,去比賽都係媽咪幫我抬琴,琴線都係佢幫我穿。」

    「彈豎琴畀人覺得好公主,但學咗先發覺,玩豎琴嘅人要好捱得,手指唔夠力、挨唔到痛就學唔到,而且要搬搬抬抬個琴。」

    Vicky有意拍片講解有關學習豎琴的疑難,最近亦有不少表演豎琴的邀請:「有考慮去學演奏級,希望去世界各地演奏。」

     

     

    (on.cc)

    SHARE