【軒仔開心到彈起】張敬軒主動錫錫關智斌 全場瘋狂尖叫

歌手關智斌(Kenny)處男紅館騷舉行尾場請來張敬軒,他一出場全場又瘋狂尖叫,軒仔笑言:「尋晚啲人話紅館係核爆式掌聲。」歌迷大叫「咀佢」,軒仔即笑言:「突然聽唔到嘢嘅?」他續笑言:「所有嘉賓都有毒,老闆唔鍾意講有味笑話。」
之後兩人來個擁抱,全場又大叫「咀佢」,軒仔講錯說話:「ok,陣間先。」全場又叫,他扮聽不到繼續講:「幾好笑喎,個ear mon突然唔work。」歌迷不放過再叫,他即招架不住笑言:「有啲嘢唔好玩太盡,我都開始亂。」
軒仔又講到與Kenny同是2002年新人:「識咗17年。」全場又大叫「咀佢」,軒仔即將個波交畀Kenny:「你主場你話事。」隨即不理歌迷繼續講:「最近預備演唱會,諗唱咩歌摷番舊相,出道個樣老土啲、kai啲。」隨即大騷一張與DJ當奴扮BOYZ的相片,全場大笑。
他續謂與Kenny識於微時:「識佢嗰陣我啱啱嚟香港做嘢,大家起點一樣,事業各自開始,好開心今日可以同佢分享呢個舞台。」隨即又講錯說話:「以下呢首歌佢睇住我寫。」全場又起哄,他解釋:「佢睇住呢首歌點發行,人生寫咗兩首關於書嘅歌,一首係寫畀佢嘅《預言書》,而呢首《笑忘書》當時正值我哋兩個冇乜工作。」大家又起哄,他解釋:「當時好多藝人都冇乜工作,因為非典。」兩人隨即合唱《笑忘書》,又搭膊及攬攬。
接着軒仔又講:「人生得一知己死而無憾。」大家再度起哄,他即忍不住沒好氣笑言:「唔好講乜都叫,對號入座,即係FF。」續謂與Kenny見到對方高低起跌,好難用三言兩語講,又謂以下的歌當年Kenny是第一個收到demo:「但當時佢冇發行國語歌嘅計劃,所以冇用,首歌擺咗7年後我收錄喺我嘅專輯,好多回憶同情感同大家分享。」隨即唱出《只是太愛你》。
Kenny又多謝張敬軒,全場即起哄,這時鏡頭影住企控制台的軒仔:「佢幫我演唱會好多,調音、諗rundown,點樣幫演唱會盡善盡美,又教我喺台上表演,雖然我都知自己仲有好多瑕疵。」
Kenny更跪謝基仔他們,祖兒即抵死搞氣氛謂:「既然你咁開心多謝我哋,逐個錫一啖囉。」全場即起哄,之後基仔開始錫Kenny的面,祖兒和阿Sa更齊齊與Kenny蜻蜓點水咀嘴…
此時剩下軒仔未咀,阿Sa即抵死謂:「我好驚,頭先已經錫面錫咀,唔知之後會錫邊度呢?」接著全場起哄,其他人叫軒仔搽定潤唇膏,之後萬眾期待的一幕終於出現…
兩人本身有些尷尬,其後軒仔終於主動錫Kenny的面珠,但就極快速錫得一秒,全場瘋狂尖叫,錫完軒仔更開心彈起,他無奈笑言:「原來你哋呢班人係咁玩得嘅!」
但他錫完後即行去另一邊,其他人發現,即拉返他及Kenny企在一起,最後眾人合唱《眼紅館》為演唱會作結。
騷後在慶功宴舉行祝捷儀式,受訪時問到與張敬軒咀完可有尷尬?他即表示:「我成晚都咀咗好多人,我哋太friend啦,成家人咁。 (當軒仔係一家人?)成個英皇一家人,佢哋好支持,冇咩尷尬。」問到兩人可是感情復合?身旁的經理人霍汶希(Mani)即擋駕:「與感情冇關,英皇文化家庭觀念好重。」Kenny亦謂:「呢個問題好奇怪,就咁見面錫吓,成日見到其他人例如容祖兒都係咁。」
(綜合報道 / on.cc)