森美日前接受杜汶澤網上節目時，自爆口腔有色素瘤。
森美於節目中透露：「有日我發現口腔入面有粒黑色嘅痣咁樣，初頭冇理到，即係生粒癦冇乜嘢啦！直到今年年中，我有個醫生朋友，牙醫嚟，佢幫我睇牙，佢一見到就話『咦，你口腔入面有黑色嘅痣，口腔入面好少有痣嘅，你睇吓專科』臨走時佢無端端攤喺度望住我，我仲記得佢個表情『得閒出嚟見下面囉…下個禮拜約啲Friend出嚟飲嘢啦吓』，佢一講完我個心即刻怯一怯……」
幸好最後發現是良性色素瘤，但此事令森美改變了很多很多。（相關新聞：https://bit.ly/2keZ1QE）
森美昨日出席活動時，表示現時已經沒大礙，幸好色素瘤屬良性，但今次事件令他更加珍惜與家人相處的時間，他笑說：「我望住個女做功課，望咗一個鐘，佢都覺得我望住佢好怪，報道出咗佢哋都好似未知，之前覺得我怪怪哋，佢哋就有問，但佢哋大個就會知，佢哋都要知生老病死係必經階段，我同佢哋講如果我有日唔喺度，就睇番我寫嘅書同專欄，因為我想講嘅嘢都寫晒入去，但佢哋到而家都未睇！」
森美與囡囡
森美仔仔
有人提議他做一個全身檢查？森美即耍手說：「而家係驚咗做Body Check，因為等報告嘅嗰段時間真係好驚，每次拍《娛樂大家》都當係最後一次。」
回想手術後等待化驗結果，心情十分忐忑，他說：「當時老婆喺英國陪個仔考會考，因為我哋都有信仰，我哋每晚都有祈禱、傾電話，喺工作上，我有話比小儀、節目監製同電台高層知道，如果真係Cancer，就會有其他安排。」
同場的麥美恩透露有看到森美的訪問，她說：「我係哽咽，睇完仲喊咗出嚟，我有為佢祈禱，我覺得佢好勇敢，因為我都有經歷過家人患癌症走咗或者好番，我喊係明白佢嗰種無助嘅感覺，所以我覺得佢一個面對係唔容易。」
她透露將與森美出發日本拍攝《森美旅行團3》，她說：「如果佢有事，上年話拍第三季嘅承諾就會有變數，好彩上天畀佢捱過，可以繼續對住我！」
(綜合報道 / appledaily)
